DILI, 28 Marsu 2025 (TATOLI) – Diretór Jerál Koordenadór Asuntu Ekonómiku, Jorge Rui de Carvalho Martins, hateten, Timoroan tenke matenek atu promove no dezenvolve eko-turizmu iha Timor-Leste (TL). Nune’e mós Governu mós tenke integra setór hotu-hotu hodi partilla servisu hamutuk hasa’e rikeza naturál sira ne’ebé kapas hodi atrai turista sira.
“Entaun Timoroan tenke matenek ho nia tasi ne’ebé mak azúl kapas sai fali produtu turístiku, emprededór sira tenke kria fali atividade ne’ebé mak atrativu para ema bele mai haree tasi ne’e,” Diretór ne’e perante ba jornalista sira, iha salaun Sentru Konvensaun Dili (CCD), Kaikoli, Dili, ohin.
Ezekutivu ne’e konsidera turizmu ne’e setór ida-ne’ebé “inkluzivu”. Katak, la’ós Ministériu Turizmu nia responsabilidade de’it maibé ministériu sira seluk mós, inklui entidade relevente sira, tantu públiku nune’e mós privada.
Notísia relevante:Ministru Bendito no Anne-Marie diskute diversifikassun ekonómia-turizmu
Nia esplika, dezenvolvimentu turizmu ne’e, la’ós de’it kadalak ka rikeza naturál sira-nia beleza de’it maibé dezenvolve oinsá nune’e atrai ema seluk mai haree.
“Ita tenke iha planu integradu ida-ne’ebé integra setór hotu, billete tenke baratu, ita-nia produtu turizmu tenke atrativu, i tenke bazeia ba ita-nia natureza duni”, Diretór ne’e afirma.
Dezenvolvimentu turizmu iha Timor-Leste, tuir autoridade ne’e katak seidauk dezenvolvidu hanesan nasaun seluk maibé la’ós katak Timór laiha paisajen furak. “Presiza Governu nia planu atu dezenvolve ho di’ak liután fatin turizmu sira hodi atrai ema estranjeiru”.
Nune’e, Diretór Jerál Koordenadór Asuntu Ekonómiku, Jorge Rui de Carvalho Martins salienta, Governu nia esforsu ne’e mak agora foka ba eko-turizmu, eko turizmu ne’e la’ós lori fali sidade ba suku.
“Eko turizmu ne’e ita dezenvolve turizmu, inklui dezenvolvimentu turizmu ida-ne’ebé mak bazeia ba komunidade nia kbiit. Nia iha uma oan ida, maibé nia iha paisajen ida kapas, dezenvolve nia uma ne’e”, nia esplika.
Notísia relevante:Horta propoin atu RAEOA-ZEEDOA fó importánsia ba turizmu no otél
Jornalista: Alexandra da Costa
Editór: Rafael Ximenes de A. Belo
