DILI, 28 Marsu 2025 (TATOLI)—Ministru Negósiu Estranjeiru no Kooperasaun (MNEK), Bendito dos Santos Freitas, kinta (27 Marsu 2025) ne’e, hasoru malu ho Sekretária Jerál Ministériu ba Europa no Negósiu Estranjeiru Fransa, Anne-Marie Descotes, hodi diskute kona-ba diverifikasaun kooperasaun bilaterál iha área ekonomia no turízmu.
“Diskusaun ho Sekretária Jerál Ministériu ba Europa no Negósiu Estranjeiru Fransa ne’e foka liu ba diverifikasaun kooperasaun bilaterál iha área ekonomia no turízmu nasaun rua nian,” Ministru Bendito hateten liuhusi nota ne’ebé Agência TATOLI asesu husi media MNEK, ohin.
Nia hato’o agradesimentu ba apoiu ne’ebé durante ne’e Governu Fransa fó ba Timor-Leste liu-liu iha área Peace Keeping Operation Military (vizita ró militár França nian ba Timor-Leste); Kursu Lian Fransa nian ba diplomata sira iha MNEK; projetu Portu Baia Tibar ne’ebé ho modalidade Parseria Públika Privada no mós haree possibilidade atu loke Embaixada Fransa nian iha Timor-Leste.
Iha okaziaun ne’e, Sekrertária-Jerál Anne-Marie hato’o agradesimentu ba partisipasaun Governu Timor-Leste nian iha Simeira Nutrisaun ba Kreximentu hanesan kompromisu Governu Timor-Leste nian atu kombate subnutrisaun iha futuru.
Oportunidade ne’e, Sekretária-Jerál ne’e mós aprezenta ba Ministru Negósiu Estranjeiru no Kooperasaun ho delegasaun kona-ba konvite ba Prezidente Repúblika, José Ramos Horta atu partisipa iha UNOC Summit on the Oceans.
Enkontru ne’ebé akompañadu hosi Embaixadór Timor-Leste ba Bruxelas no Akreditadu ba Repúblika Fransa, Jorge Camōes, Diretora Jerál Asuntu Bilaterál ba Áfrika, Europa no Amérika interina, Josefina Tilman, hafoin partisipa iha abertura Simeira Nutrisaun ba Kreximentu (N4G Paris 2025) ne’ebé hala’o iha París-Fransa.
TL partisipa abertura simeira nutrisaun ba kreximentu Paris 2025
Iha parte seluk, Ministru Bendito akompañadu husi Vise-Primeiru-Ministru no Ministru Koordenadór ba Asuntu Sosiál no Ministru Dezenvolvimentu Rurál no Abitasaun Komunitária, Mariano Assanami Sabino partisipa iha abrtura Simeira Nutrisaun ba Kreximentu, París 2025 (N4G Paris 2025).
Governu Fransa mak sai hanesan uma-na’in ba Simeira Nutrisaun ba Kreximentu iha Paris iha loron 27 to’o 28 fulan-Marsu 2025, ho nia objetivu atu mobiliza komunidade internasionál liuliu setór privadu no sosiedade sivíl sira, kona-ba kestaun nutrisaun nian hodi bele atinje Objetivu Dezenvolvimentu Sustentável sira-ne’ebé estabelese husi Ajenda 2030 ONU nian.
Problema sira mánutrisaun nian–mánutrisaun, defisiénsia dietétika, todan liu no obesidade–sai aat liután iha mundu tomak.
Fransa hatán ba problema boot ida-ne’e hodi kontinua nia esforsu sira liuhusi nia estratéjia internasionál kona-ba seguransa ai-han, nutrisaun no agrikultura sustentável (2019-2024) no liuhusi asaun konkreta sira, hodi hadi’a nutrisaun ba populasaun sira-ne’ebé vulnerável.
Hirak-ne’e inklui ajuda ai-han; Inisiativa Muskoka kona-ba Saúde Inan, Bebé Foin Moris no Labarik; no esforsu sira husi Ajénsia Dezenvolvimentu Fransa nian iha setór saúde, agrikultura, bee, ijene no saneamentu.
Simeira ne’e loke ofisialmente husi Primeiru-Ministru Fransa, François Bayrou no partisipa mós husi Sua Majestade Reinu Unidu, Espoza Prezidente Brazil, Rosângela Lula da Silva, parseiru internasionál, sosiedade sivil no seluk tan, hodi reafirma kompromisu atu kombate subnutrisaun iha nível globál.
Jornalista : Hortencio Sanchez
Editór : Cancio Ximenes
