DILI, 06 Abríl 2025 (TATOLI) –Ministru Komérsiu, Indústria, Nino Pereira hala’o vizita ba empreza, Asarini Service suku sofa, iha Bebonuk, Komoro-Dili ho objetivu atu promove no hakbiit setór privadu liuhusi mikro negósiu no eleva joven produtivu sira atu promove espirítu imprendedorizmu iha Timor-Leste (TL).
Vizita ne’e mós relasiona ho polítika Governu Konstitusionál da-sia katak promove no hakbiit setór privadu liliu empreza mikro liuhusi dalan fó formasaun, promove produtu no mós fó kréditu ba sira, nune’e sira bele expande tan sira-nia negósiu.
“Ita haree katak durante ne’e ita-nia empreza mikro-ki’ik halo sira-nia atividade lubun ida ona, no kontribui mós ba ita-nia dezenvolvimentu iha nasaun ida-ne’e, promove espíritu emprendedorizmu, ida-ne’e importante para ita bele hahoris emprezáriu foun sira-ne’e, maske sira hahú negósiu ho eskala ki’ik”, Ministru Komérsiu Indústria, Nino Pereira, informa ba jornalista sira iha fatin Asarini service, Bebonuk, Komoro-Dili, foin lalais ne’e.
Ministru ne’e hateten, liuliu mak joven sira atu bele haree atividade produtiva sira, liga ba oportunidade negósiu ne’ebé iha ita-nia nasaun iha formasaun oioin ho abilidade ne’ebé sira iha bele aproveita hodi kria empregu ba sira-nia aan.
“Sira mós iha planu ne’ebé di’ak atu oinsá aumenta tan. Ita-nia kualidade produsaun, ho hanoin dehan ita atu promove signifika Governu mak sai hanesan parseiru estrátejiku hamutuk ho setór privadu”, nia haktuir.
Nia akresenta, empreza Asarini empreza ki’ik ne’ebé durante ne’e sira-nia atividade ne’e la’o di’ak maske sira dehan depende ba iha enkomenda husi kliente sira tanba ne’e mak MKI haree katak importánsia husi saida mak sira halo ona no sira mós hatudu sira mós iha rejistu.
“Maibé imi tenke kontinua ho saida mak imi iha, presiza hadi’a mak jestaun fatin no presiza iha jestaun administrasaun ida, nune’e bele jere rendimentu ne’ebé iha hodi hatene osan hira mak sai, osan hira mak tama no planu sei uza halo tan saida”, nia enkoraza.
Iha fatin hanesan, Jestór empreza Ferdinando de Araújo ralata katak empreza ne’e harii iha tinan-2021, no iha prosesu loke negósiu ne’e sempre enfrenta problema barak hanesan, menus ekipamentu no fatin.
“Tanba ne’e husu ba Governu atu nafatin promove negósiu ki’ik no ohin Ministru dehan rasik katak sei loka banku kréditu, no ami espera katak ami bele rejistu ba iha ne’ebá para bele aumenta tan ami-nia negósiu halo boot liután”, nia rekomenda.
Jestór ne’e hatutan, ekipamentu ne’ebé mak iha sosa de’it iha Timór, iha Kristal shop, no produsaun sira ne’e, seidauk hatama ba iha loja sira, tanba iha hela faze hadi’a no planu sei prodús produtu rasik.
“Traballadór sira servisu mós la permanente tanba servisu ne’e depende ba orderan (hameno) husi kliente, bainhira sira order foin traballadór sira mai ajuda servisu. No, osan sira hetan husi pursentu produsaun nian, servisu hotu fó kedas saláriu”, nia hato’o.
Entretantu, Empreza Asarini Servisu suku sofa, implementa husi joven produtivu sira hodi kria rasik negósiu ba sira-nia aan.
Atividade ne’ebé sira halo mak suku sofa ba mobiliáriu uma nian, inklui mós ba karreta sira. Kada presu hahú husi USD 100-500. Atividade ne’e la’ós halo loro-loron, maibé depende ba enkomendasaun husi kliente sira no daudaun ne’e traballadór hamutuk na’in sanulu.
Jornalista: Alexandra da Costa
Editór: Rafael Ximenes de A. Belo
