DILI, 19 Abríl 2025 (TATOLI)– Arsebispu Arkedioseze Metropolitana Dili, Dom Virgílio Kardeál do Carmo da Silva, SDB, iha nia omilia iha misa sábadu Aleluia, haklaken katak Jesus nia moris hias hodi manan mate nia ukun nu’udar konkista ida hodi fó salvasaun ba umanidade no leno hikas naroman ba sarani sira hotu hodi sai husi nakukun.
“Ohin kalan ne’e, Jesus moris hias ona atu halo foun no fó hikas naroman mai ita husi ita-nia fuan, atu sai husi nakukun liuliu buat hirak ne’ebe hamate ita-nia esperansa mak falta konfiansa, nune’e bainhira fó espasu ba ideia katak buat hotu-hotu la la’o di’ak iha ita-nia moris no kada loron ita-nia esperansa sai mihis tanba dala barak mate mak forte liu ona moris”, Don Virgílio Kardeál haklaken iha nia omilia, iha Katedral Vila-Verde, sábadu ne’e.
Notisa relevante:Kinta-feira Santa nu’udar loron hafoun aan liuhusi mandamentu foun
Don Virgílio Kardeál haktuir Jesus la hela ba ema ne’ebé lakon esperansa nia le’et tanba Jesus nia moris hias atu fó salvasaun tanba Nian la’ós Maromak mate nian, maibé Nia Maromak moris nian. Tan ne’e Keta hakoi ita-nia esperansa.
“Dalan ne’ebé feto sira lori mina-morin ba Jesus nia rate hanesan mós ita ida-idak nia dalan. Ida-ne’e mak ita-nia dalan atu ba salvasaun ninian. Ne’ebé kalan ida-ne’e ita perkore hamutuk, dala barak iha moris ita mós la’o hasoru fatuk no moru oioin iha ita ida-idak nia moris. Maromak hasai povu ne’ebé nia hadomi iha egiptu, liberta povu eskavidaun”, dehan.
Arsebispu ne’e dehan Páskua mak festa ne’ebé atu hasai sala, tauk, hamate esperansa no espetativa sira liuliu salva ita husi hahalok hanoin de’it mak buat isin nian.
“Ohin, Jesus konvida ita atu hamriik metin iha ita-nia liafuan, hateke ba oin fiar katak Maromak halo ita atu hateke ba Lalehan. Maromak husu ita atu haree buat ne’ebé nia haree. Haree ida ho Maromak nia matan ho furak, beleza dignidade ne’ebé labele nega tanba ita hotu lori illas Maromak nian”, Bispu ne’e esplika.
Jesus mak espesialista ne’ebé transforma mate ba moris, halerik sira ba dansa, nune’e ho Nian mak bele hala’o páskua katak pasajen taka aan ba komunaun, husi laran susar ba konsolasaun, husi tauk ba laran metin.
“Páskua hanorin ita fiar na’in sira, atu la hela iha rate maibé bolu ita ida-idak ba hasoru ida-ne’ebé moris. Jesus nia moris ida-ne’e fó hanoin mai katak ha’u atu la’o loos ba ne’ebé, tanba husi ita-nia problema oioin, ita ba Jesus tanba ita presiza nia tulun”, Arsebispu afirma.
Notisia relevante:Komandu PNTL garante seguransa iha selebrasaun Santa-Páskua
Jornalista : Osória Marques
Editór: Florencio Miranda Ximenes
