Komandante PNTL Dili presta omenajen ba falesimentu Papa Francisco
DILI, 22 Abríl 2025 (TATOLI)- Komandante Polísia Nasionál Timor-Leste (PNTL) Munisípiu Dili, Superintendente Xefe Polísia Orlando Gomes lori família no Komandu PNTL Munisípiu Dili presta omenajen ba falesimentu Sua Santidade Papa Francisco.
“Ita triste tanba nia (Sua Santidade Papa Francisco) halo vizita ona mai iha Timor-Leste no agora husik ona nia iis no fila-fali ba aman Maromak nia kadunan Santo. Nune’e hanesan pesoál, no Komandante lori membru tomak iha Komandu Munisípiu Dili presta omenajen ba Sua Santidade Papa ne’ebé mak la hamutuk ho ita, maibé ninian espiritu no klamar nafatin ho ita, nune’e dudu ita hodi ita-nia fiar nafatin ba Maromak”, hateten ba jornalista sira hafoin presta omenajen iha Câmara Eclesiástica da Arquidiócesis Metropolitana de Dili-Lecidere, ohin.
Notísia relevante:PNTL garante seguransa durante Lutu Nasionál ba falesimentu Papa Francisco
Komandante ne’e dehan, hanesan sarani presiza presta omenajen ba Sua Santidade Papa Francisco nia mate.
“Ha’u hanoin katak ita fó omenajen hodi fó onra ba ita-nia Sua Santidade Papa ne’ebé mak husik ona ita iha rai ida-ne’e”, nia hakotu.
Rekorda fali katak iha loron segunda (21/4), horiseik oras 15:15 lokraik, Vatikanu fó sai katak Papa Francisco hakotu ona iis hodi fila ba Aman Maromak nia kadunan Santu iha tuku 7:35 oras Vatikanu. Ho falesimentu Sua Santidade Papa Francisco nian ne’e lori tristeza ba sarani timor oan.
Notísia relevante:Governu-Igreja asina livru kondolénsia kona-ba Papa Francisco nia falesimentu
Jornalista: Natalino Costa
Editór: Florencio Miranda Ximenes
