DILI, 05 Maiu 2025 (TATOLI)—Prezidente Komisaun Promosaun Diviza Tranzitória, Paulo de Assis Belo, hateten Governu promete sei halo reforma dignu ba membru Polísia Nasionál Timor-Leste (PNTL) ne’ebé pasa ona bá idade reforma.
“Ita halo ona promosaun tranzitória ba diviza ba membru polísia sira. Tuirmai ita sei halo rekrutamentu no ita mós halo reforma no reforma ida-ne’e Governu promete sei halo ho dignu ba membru PNTL,” Paulo hateten ba jornalista sira hafoin partisipa serimónia Promosaun Diviza Trazitória ba membru PNTL 400-resin husi Komandu Jerál PNTL ne’ebé hala’o iha kuartél Jerál PNTL, Kaikoli, segunda ne’e.
Nia dehan, Governu obrigadu atu fó reforma dignu ba nia ema sira liuliu ba membru PNTL kuandu pasa ba reforma tenke trata sira ho dignu.
“Reforma dignu ne’e haree ba hadi’a reformadu sira-nia pensaun. Ita tenke haree hodi hadi’a sira-nia pensaun para pelumenus uluk sira sei ativu hanesan polísia ne’e sira-nia saláriu hira, agora sira bá reforma ne’e sira-nia pensaun reforma hira, nune’e ita bele fó buat di’ak ba sira atu sira bele goza iha sira-nia reforma ida-ne’e,” nia esplika.
Tuir Paulo Assis katak kuandu Governu la dignifika sira (polísia reformadu), invéz sira atu bá hametin estabilidade no pás iha sosiedade, maibé bele kria fali problema iha sosiedade.
Jornalista: Natalino Costa
Editór: Xisto Freitas da Piedade
