DILI, 07 Maiu 2025 (TATOLI)-Ministériu Edukasaun (ME) liuhusi Diretór Nasionál Ensinu Sekundáriu Jerál, Benjamin Fernandes, hatete osan konsensaun eskolár ba eskola sekundária tama konta eskola nian, ne’ebé husu direjente eskola atu utiliza ba eskola nian.
“Kada fulan transfere hamutuk $84.622 ba totál estudante 42.311. Konsensaun eskolár tinan ida-ne’e Ministra Edukasaun aprova ona, maibé ami labele halo tranferénsia ba sira-nia konta bankária tanba seidauk finaliza relatóriu tinan kotuk”, katak nia ba TATOLI iha nia knaar fatin, kuarta ne’e.
Osan ba programa konsensaun eskolár ne’e Ministéri Edukasaun liuhusi DNESJ aloka ona $507.732 ba estudante hamutuk 42.311.
Direitór Eskola Ensinu Sekundáriu Jerál (ESJ) 4 Setembru Balide, Sergio Alfredo da Cruz, hatete ninia eskola simu ona osan konsensaun eskolár.
“Diretór Nasionál Ministériu Edukasaun informa ona katak osan konsensaun eskolár sai ona. Ne’ebé ida-ne’e prepara ba nesesidade eskola nian, hanesan halo fotokopia matéria ba estudante, sosa kadeira ba manorin sira”, nia dehan.
Totál osan konsensaun eskolár ba ESJ 4 Setembru Balide hamutuk rihun $48 ba estudante hamutuk 2.389.
Notísia relevante: DNESJ husu eskola sira aselera relatóriu ba konsensaun eskolár
Jornalista : Osória Marques
Editora : Rita Almeida
