DILI, 28 Marsu 2025 (TATOLI)-Diretór Diresaun Nasionál Ensinu Sekundáriu Jerál (DNESJ) husu ba dirijente eskola sira iha teritóriu atu submete relatóriu ba osan konsensaun eskolár, nune’e labele prejudika jestaun administrasaun eskola-nian.
Diretór DNESJ, Benjamin Fernandes, hatete Ministéri Edukasaun liuhusi DNESJ prepara ona $507.732 ba estudante hamutuk 42.411 ba fulan-neen nian husi Janeiru to’o Juñu.
“Kada fulan transfere hamutuk $84.622 ba totál estudante 42.311. Konsensaun eskolár tinan ida-ne’e Ministra Edukasaun aprova ona maibé ami labele halo tranferénsia ba sira-nia konta bankária tanba seidauk finaliza relatóriu tinan kotuk”, katak nia iha nia knaar fatin Vila Vede, sesta ne’e.
Nia informa, munisípiu Baukau, Dili, Vikeke, Lautein, Likisa, Ermera Manufahi no Manatutu, mak seidauk submete relatóriu.
“Ami labele prosesa, hein relatóriu tama hotu ona mak transfere dala-ida ba eskola. Maibé Manatutu nian ita foti fali osan ona tanba sira la-ezekuta hotu entaun fulan-rua ne’e ita hatama fali ba kofre Estadu. Osan ne’e hamutuk $4.000-resin”, nia dehan.
Dirijente ne’e hatete, ida-ne’e ba eskola ESJ de’it maibé eskola sekundáriu privadu ME hein de’it tanba sira mós seidauk submete relatóriu hotu.
“Eskola sekundáriu privadu iha Timor-Leste iha ualu de’it, hitu iha Dili no ida iha Baukau. Nune’e nia montante osan la hanesan ho eskola públiku, eskola privadu ita fó kada ema dolar ida no públiku ita fó dolar rua. Ita fó dolar ida tanba eskola privadu ho jestaun privadu no sira hetan propina hosi alunu”, dehan.
Benjamin dehan prosesu transfere osan ba eskola sira ne’e sei prejudika ba prosesu hotu-hotu iha kada eskola nian maibé ME tenke bazea ba relatóriu. Relatóriu mai sedu mak simu sedu no mai tarde mak sei simu tarde mós.
“Ami mós kesi-metin ho regra finansa katak eskola submete ona relatóriu mak ami foin bele tranfere osan, kuandu seidauk mak ami mós labele prosesa lai”, dehan.
Notísia relevante: Utiliza orsamentu konsensaun eskolár tuir matadalan
Jornalistra : Osória Marques
Editora : Rita Almeida
