DILI, 08 Maiu 2025 (TATOLI) – Garante dezenvolvimentu no evita risku inundasaun, Governu liuhusi Sekretáriu Estadu Asuntu Toponímia no Organizasaun Urbana (SEATOU) kontinua halo despezu administrativu ba uma kain-sia ne’ebé pertense iha mota-ninin hodi hala’o negósiu iha Kasnafar, suku Dare.
Sekretáriu Estadu Asuntu Toponímia no Organizasaun Urbana, Germano Santa Brites Dias hateten, atu garante dezenvolvimentu ba espasu públiku no evita risku inundasaun, SEATOU kontinua halo atividade despezu administrativu iha kapitál Dili, iha horiseik, horibainrua ne’ebé konsege limpeza ona komunidade sira-ne’ebé afetadu ba inundasaun iha aldeia Moris foun, suku Komoro nian.
No, iha lorokraik ne’e kontinua mai fali iha área Kasnafar suku Dare, iha uma-kain sia antes ne’e ekipa konjunta tau tiha ona markasaun iha fulan tolu ka haat liubá. Tanba ne’e, fó hanoin antes tiha ona katak sira ida-idak prepara hodi muda ba sira-nia fatin, atu fatin oin ne’e labele okupa fali trotoar ne’e tau fali produtu hodi halo negósiu nian, atu estraga fali imajen estrada nian.
“Nune’e mós iha komunidade sira-nia kotuk ne’e iha mota. Entaun bainhira bee mai kuitadu bele fó risku ba sira, entaun horiseik ita mai fó ona avizu para sira bele koopera ho Estadu, no ohin ita mai sira hasai ona sira-nia sasan tanba ne’e Governu iha obrigasaun para salva ninia povu sira husi risku mota nian”, Sekretáriu Estadu Germano Santa Brites Dias ba jornalista TATOLI iha Kasnafar, Dili, ohin.
Governante ne’e dehan, maiória komunidade sira-ne’e hela iha área rai-hun nian, maibé sira mai okupa iha fatin ida-ne’e hodi hala’o negósiu hanesan halo kioské no loke barraka ba fa’an sasan sira, maske sira la hela permanente maibé barraka sira-ne’e besik mota-ninin no okupa espasu públiku.
Nune’e iha fatin hanesan, tuir komunidade afetada, Ovalda Lopes Carvalho, antes ne’e SEATOU sira mai tau ona markasaun no sira mós fó notifikasaun ba sira hodi prepara sobu rasik sira-nia barraka.
“Sira mai hateten de’it katak agora tenki sobu tamba ne’e fatin risku, ne’e mak ami mós hatan ba sira dehan ami nu’udar povu sei hakarak servisu hamutuk ho Estadu, ami prontu atu sobu maibé ami-nia direitu ne’e mak Governu labele haluha”, komunidade ne’e dehan.
Nia haktuir, maske iha momentu ne’ebá nia mós iha emosaun hakilar ekipa konjunta sira hodi dehan, “Tanba saida ne’e rai Estadu. Povu iha mak Estadu iha se povu laiha Estadu mós laiha ne’e mak ekipa konjunta dehan, mana nonok tiha! Depois mana sira haree prepara mak konta bankária no dokumentus sira lori ba hatama iha MOP. Entaun durante ne’e ami mós lori ona dokumentus sira ba hatama iha terras propriedades tona hodi hein prosesu indemnizasaun nian”.
Ovalda Lopes sente triste tanba labele halo ona negósiu hodi buka moris tanba durante ne’e sira buka moris iha barraka dalan-ninin tanba sira hela besik rai-hun entaun difisíl ba sira atu hala’o negósiu.
Entretantu tuir observasaun jornalista nian iha terrenu, SEATOU kontinua orienta mákina eskavatór hodi harahun tiha barak ne’ebé besik mota-ninin no okupa trotoar, aleinde ne’e komunidade sira mós koopera ho di’ak ka lamosu dezintendimentu iha terrenu.
Jornalista: Alexandra da Costa
Editór: Rafael Ximenes de A. Belo
