DILI, 12 Maiu (TATOLI)-Ministru Petróleu no Rekursu Minerál (MPRM), Francisco da Costa Monteiro, husu ba estudante Universidade Dili (UNDIL) atu kontinua mellora kapasidade iha área jeolojia, nune’e dezenvolve Nasaun liuhusi koñesimentu ne’ebé di’ak.
“Husi jeolojia mak permite ita bele identifika rikusoin sira no mós aban bainrua risku ne’ebé relasiona ho potensia ne’ebé mak iha hodi ikusmai ita halo ita-nia planu, dezenvolve ita-nia nasaun”, dehan nia ba estudante UNDIL, segunda ne’e iha ámbitu semináriu loron mundiál jeolojia ba dala X ho tema jeolojia nu’udar xavi ba sustentabilidade.
Ministru iha ninia abertura semináriu afirma jeolojia ne’e importante tebes liga ho esplorasaun ba rekursu mineral, tanba ninia efeitu sei muda ekolojia no ekosistema, nune’e semináriu ida-ne’e importante tebes ba estudante sira atu hatene no komprende di’ak liután importánsia husi esplorasaun.
“Ita motiva hotu-hotu atu bele servisu ho objetivu ida ho esforsu ida, asegura ita-nia rikusoin sira iha Timor-Leste”, nia dehan.
Reitór UNDIL, José Agostinho da Costa, hatete universidade nia papel mak halo diskusaun, debate no semináriu. Nune’e ohin loron mundiál jeolojia nia, UNDIL realiza semináriu ba estudante sira, liuliu departamentu jeolojia, nune’e sira bele iha koñesementu klean liután ba área ne’e.
“Jeolojia ne’e matéria ida importante, Mundu tomak halo selebrasaun, Timor mezmu kiik maibé ita-nia vizaun tenke ba oin, ita independénsia tinan barak ona, moris di’ak ba ita seidauk tanba ne’e mak independénsia ne’ebé kompleta tenke ita-nia rekursu natural”, akresenta.
Nia dehan jelojia ho minerál ne’e estudante sira tenke servisu maka’as, dosente sira, akadémiku sira, atu tenta tan buka ita-nia rekursu sai duni benefisiu ba Timoroan hotu. Ida-ne’e mak hanesan semináriu ida MPRM mai fó vizaun, tékniku sira mai fó hela sira-nia hanoin nune’e hotu-hotu informadu, hodi sente dehan Timor rai kiik maibé rekursu sira-ne’e sei natón, jestaun di’ak moris di’ak ba Timor ne’e sein dúvida.
Nia hatutan, presiza promove no investe maka’as iha área jeolojia no petróliu atu bele bele hetan tan rekursu di’ak sira-ne’e hodi kontribui ba Nasaun.
Dekanu Fakuldade Engeñaria UNDIL, Januário Freitas Araújo, tema ba semináriu loron mundiál jeolojia ne’e signifika la’ós ba ohin de’it maibé sei utiliza ba tempu naruk hodi sustenta Timor ba oin, liuliu iha área rekursu nia.
“Tanba ne’e mak importante tebes realiza semináriu hodi haklean estudante sira-nia koñesimentu iha área jeolojia nia”, tenik.
Notísia relevante: Institutu Jeosiénsia Timor-Leste identifika bee-manas iha fatin 17
Jornalista : Osória Marques
Editora : Rita Almeida
