DILI, 12 Maiu 2025 (TATOLI)—Prezidente Repúblika (PR), José Ramos Horta, liuhusi Dekretu Prezidensiál númeru 40/2025, 12 Maiu, publikadu iha Jornál Repúblika, segunda ne’e, nomea ona Prokuradór Nelson de Carvalho, asumi kargu Prokuradór Jerál Repúblika (PJR) ba mandatu tinan haat.
“Konfirmadu. Ha’u sei simu pose husi Prezidente Repúblika iha Palásiu Prezidénsia Repúblika, iha tersa (13/5), tuku 17:00 Otl. Agora ha’u seidauk bele ko’alia buat ida lai,” Prokuradór Jerál Repúblika nomeadu, Nelson ba Tatoli, via telefónema.
Rekorda fali katak mandatu Prokuradór Jerál Repúblika, Alfonso Lopez, termina ona iha loron 29 Abríl 2025.
Tuir Konstituisaun RDTL artigu 86 kona-ba Prezidente Repúblika nia kompeténsia ba órgaun sira seluk iha alínea K deskreve katak Prezidente Repúblika nia kompeténsia ida mak foti Prokuradór Jerál Repúblika nian hodi hala’o kna’ar iha tinan haat nia laran. No, artigu 133 husi Konstituisaun RDTL ne’ebé ko’alia kona-ba Prokuradór Jerál Repúblika iha alínea 3 fundamenta katak Prezidente Repúblika mak hatudu Prokuradór Jerál Repúblika nian ba mandatu tinan haat, nu’udár lei hateten.
Jornalista: Natalino Costa
Editór: Xisto Freitas da Piedade
