OEKUSI, 14 Maiu 2025 (TATOLI) – Autoridade Rejiaun Administrativa Espesiál Oekusi Ambeno (RAEOA), lideradu Rogério Tiago de Fátima Lobato, deside ona programa prinsipál rua ho nia orsamentu hamutuk rihun $72 ba komemorasaun loron Restaurasaun Independénsia 20 Maiu ba dala-23 iha Oekusi.
Prezidente Komisaun Organizadora ba komemorasaun loron Restaurasaun Independénsia 20 Maiu 2025 iha Oekusi, atuál Sekretáriu Rejionál ba Asuntu Administrasaun, Andre Lao, informa katak, komisaun no xefe seksaun sira prepara ona konvite no fatin ba komemorasaun iha sei konsentra iha kada sub-rejiaun sira.
Notísia relevante:Governu aprova tema jerál “Hametin Pás no Dezenvolvimentu” ba komemorasaun 20 Maiu
“Ami enkontru ikusliu iha horsehik, komisaun organizadora ho sesaun sira hotu prepara, ne’ebé ami define programa rua halo animasaun iha loron restaurasaun independénsia 20 Maiu, mak desportu komunitáriu no misa agradesimentu, ne’ebé nia orsamentu aloka ona ne’e rihun $72,” Andre Lao, ba jornalista sira iha Oekusi, ohin.
Nia epslika, desportu komunitária hirak-ne’e komposta husi, futeból mane ba grupu juventude sira no futeból salaun ba mane, voleibál feto no mane, depois sa’e buah, dada-tali, inklui kompetisaun halai kuda, ne’ebé prioridade liu ba kuda lokál sira iha Oekusi.
“Tinan kotuk iha konvida maluk sira husi nasaun viziñu, maibé tinan ne’e ita la konvida kuda husi sorin ka munisipíu seluk, ita promove rasik ita-nia kuda kuda lokál sira mai husi suku 20 iha Oekusi,” nia hateten.
Tuir Sekretáriu Rejionál ne’e, katak, komemorasaun loron Restaurasaun 20 Maiu tinan ne’e, sei organiza konsentra iha idak-idak nia sub-rejiaun hanesan Oésilo, Pássabe, Nítibe no Pante Makasar.
“Ne’ebé Prezidente Autoridade sei dirije iha Pante Makasar, membru Autoridade sira balu sei koloka ba iha sub-rejiaun sira atu hamutuk ho autoridade lokál sira ho komunidade,” nia katak.
Entretantu, antes ne’e Konsellu-Ministru aprova ona tema jerál ba komemorasaun loron restaurasaun independensia 20 Maiu iha tinan 2025 ne’e mak ‘Hametin Pás no Dezenvolvimentu’.
Notísia relevante:Presiza hametin independénsia iha identidade no sistema ekonomia
Jornalista: Abílio Elo Nini
Editór: Florencio Miranda Ximenes
