DILI, 20 Maiu 2025 (TATOLI)—Prezidente Repúblika, José Ramos Horta, hanoin hikas Papa Francisco nia mensajen bainhira vizita Timor-Leste iha Setembru 2024, sai prezente no hanesan mina-morin ba rekonsiliasaun no dame nian ne’ebé hela nafatin, tanba Santu Padre nia liafuan sira kontinua fó-lian iha povu timoroan nia fuan, hametin fiar, inspira no fó esperansa hodi enkoraja timoroan hametin iha justisa.
“Ha’u hanoin ho emosaun partikulár mensajen sentrál husi nia vizita, simples hanesan mos transformativu: “Imi-nia Fiar sai imi-nia Kultura.” Ho liafuan sira-ne’e, Amu-Papa Francisco dezafia ita atu la ta’uk kesi Evanjellu ho klamar kle’an ita-nia identidade nian, atu sai “perfume Evanjellu nian iha rai ida-ne’e”, hanesan nia hateten—perfume rekonsiliasaun nian, dame nian, kompaixaun nian, justisa nian,” Prezidente Horta hato’o liuhusi diskursu iha aniversariu loron nasionál restaurasaun independénsia 20 Maiu ba da-23 ne’ebé realiza iha Palásiu Prezidensiál Nicolau Lobato, Bairru Pite, tersa ne’e.
Papa Francisco, Horta hateten, ninia lian no mensajen ne’ebé kmaan no metin hodi husu Timor-Leste atu habelar mina-morin ida-ne’e hasoru buat hotu ne’ebé hatun no harahun dignidade umana hanesan ki’ak, violénsia, korrupsaun, alkolizmu, la respeitu ba feto sira no indiferensa ba sofrementu liuliu hasoru funu no trajédia sira-ne’ebé harahun ohin loron.
“Ohin, bainhira ita selebra tinan ida tan ita-nia Restaurasaun Independénsia nian, ita hetan inspirasaun husi legadu espirituál no morál ida-ne’e ne’ebé husik hela husi Sua Santidade. Ami reafirma ita-nia kompromisu atu halo ita-nia fiar la’ós de’it refujiu ida, maibé sai forsa moris no transformadora ba konstrusaun sosiedade ida-ne’ebé umanu liu, justu no solidáriu liu,” nia dehan.
Nia hatutan, Sua Santidade Papa Leão XIV Sempre inspira atu estuda komunikasaun no tomada pozisaun sira-ne’ebé Santa Sé adota hasoru funu oioin, krize umanitária no trajédia sira-ne’ebé harahun ema-nia planeta.
Desizaun sira-ne’e iha signifikadu espesiál bainhira observa tuir roman personalidade no perfil Sua Santidade Papa Leão XIV nian.
“Ninia eleisaun, rezultadu husi desizaun matenek no ponderadu husi Koléjiu Kardeál sira-nian, reprezenta eskolla surpreindente ida ba analista no observadór sira husi vida Igreja nian. Maibé, ida-ne’e hatudu kle’an katak koerente tebes ho misaun milenar Santa Sé nian,” nia hateten.
Pontífise foun reafirma ona, ho klareza no determinasaun, sentralidade doutrina sosiál Igreja nian, hodi tau karidade sarani, justisa no atensaun ba sira-ne’ebé haraik-aan no vulneravel liu iha sentru ninia asaun pastorál.
Iha tempu ne’ebé mundu parese mout iha nakukun laran—marka ho violénsia, konflitu no lakon valór espirituál sira, liafuan no jestu sira husi Sua Santidade Papa Leão XIV mak fonte esperansa nian.
Hanesan Papa Francisco dehan, ita moris iha mundu desakralizadu, ne’ebé dalabarak domina hosi “Ema funu nian”.
“Atu ko’alia ohin ha’u hakruuk ho reverénsia kle’an iha Memória Sua Santidade, Amu-Papa Francisco nia oin, ba Timor-Leste no ba mundu, la’ós de’it Amu-Papa ida ne’ebé boot-liu iha tempu tomak maibé ita-nia Amu-Papa, ita-nia belun, ita-nia Pastor,” Horta dehan.
Jornalista : Hortencio Sanchez
Edirór : Cancio Ximenes
