DILI, 26 Maiu 2025–Prezidente no Laureadu Nobel ba Pás, José Ramos Horta, fó indultu ba sidadaun na’in-neen nu’udar aktu kleménsia umanitária no unidade nasionál.
Tuir Dekretu Prezidente Republika No. 45/2025, ne’ebé asina husi Prezidente Ramos Horta iha Palásiu Prezidensiál Nicolau Lobato no publika iha Jornál Repúblika iha loron 26 Maiu 2025, indultu sira-ne’e fó ba :
1. Honoria Pereira Lopes
2. Norberto Barreto João
3. Maria Goreti Abi
4. Maria Scolastica Sona
5. Julieta Godinho do Nascimento
6. Armanda Jesus das Neves
Prezidente Ramos Horta konsidera indultu hirak ne’e reflete Timor-Leste nia kompromisu ba justisa ho miserikórdia no fiar ba ema hotu-hotu nia dignidade fundamentál.
“Maski ita tenke tane a’as Estadu direitu, ita mós tenke rekoñese katak justisa loloos dalaruma presiza aktu kleménsia ne’ebé serve ba objetivu umanitáriu no promove reintegrasaun sosiál. Desizaun hirak-ne’e hametin espíritu unidade nasionál ne’ebé tenke orienta ita bainhira ita harii futuru ida-ne’ebé prósperu liu ba povu Timor-Leste tomak,” Prezidente Horta, subliña, liuhusi nota ne’ebé fó sai husi Gabinete Prezidénsia Repúblika.
Notísia relevante : PR Horta seidauk dekreta lista indultu
Desizaun ne’e reflete konsiderasaun kuidadozu ba ema ida-idak nia sirkunstánsia pesoál, umanu, família, no sosiál, nomós sira-nia potensiál ba reintegrasaun sosiál.
Perdaun prezidensál sira-ne’e konstitui intervensaun polítika no umanitária iha administrasaun justisa hodi permite aktu ekuidade individuál tuir lei konstitusionál.
TATOLI
