Kay Olo define pilár importante haat ba dezenvolvimentu juventude
DILI, 27 Maiu 2025 (TATOLI) – Jestor Programa Kay Olo Sword Gusmão kria programa foun ida hodi promove no kapasita juventude sira-nia talentu no esperiénsia no programa ne’e nia define pilár importante haat hanesan, rekreasaun sikolojia, esperiénsia, servisu voluntáriu, no jornada aventura hodi hakbiit juventude ba dezenvolvimentu.
Enkuantu programa ne’ebe Kay Olo kria ne’e ho naran Prémiu hakbiit juventude ba dezenvolvimentu no objetivu mak atu promove joven sira-nia talentu hodi kapasita sira atu inklina aan iha pilár haat ne’e. Joven sira-ne’e hahú husi idade 14 to’o 25.
“Programa ida-ne’e antes ne’e implementa tiha ona iha tinan-2009 husi grupu The Duke of Edinburgh’s Austrália ho naran The President Award maibé paradu tiha kuaze tinan barak. Entaun, iha tinan-2025 Kay Olo iha inisiativa hodi kontinua realiza fali programa ida-ne’e maibé transforma fali formatu foun tuir kontestu foun sosiedade Timór nian no programa ne’e tutela iha sala leitura Xanana Gusmão reading room nia okos no daudaun ne’e Kay Olo rasik mak sai hanesan jestór ba programa,” Operasionál sistema ba programa, Maria Santos Dias Ximenes informa ba jornalista TATOLI iha salaun VIP, Aeroportu Nicolau Lobato, Komoro, Dili, ohin.
Nia esplika, kontestu husi pilár haat ne’e sei promove joven sira-nia partisipasaun iha área hanesan karpintária, tékniku teknolojia informasaun (IT), kulinária, ambiente, manutensaun estrada lokál, jogu sira, ema ho defisiénsia, mikro-empreza, literasia no halo viajen inklui deskansa iha komunidade rurál.
Inisiativa husi programa ida-ne sei implementa mós ba iha munisípiu sira la’ós iha de’it nasionál tanba sei iha mós atividade jornada ba aventura liuliu iha área rurál sira no hetan apoiu mós husi organizasaun The Duke of Edinburgh’s Internationál Award Austrália.
“Tanba ne’e ohin loron ami mai simu ita-nia bainaka n’ain-haat husi Duke Edinburgh’s Austrália hodi partisipa iha atividade lansamentu ba programa iha loron 30 fulan-Maiu tinan ne’e,” nia informa
Aleinde ne’e pograma pilotu ne’e mós hetan apoiu husi empreza 100 iha Austrália hodi kolabora ba programa ne’e no programa ida-ne’e sei implementa durante tinan-tolu.
Entretantu, finalidade husi programa ne’e mak partisipante sira sei simu prémiu (award) ka sertifikadu ho nível internasionál no rekoñesidu globál atu kompete ba merkadu servisu internasionál.
Jornalista: Alexandra da Costa
Editór: Rafael Ximenes de A. Belo
