DILI, 27 Maiu 2025 (TATOLI)-Ministra Edukasaun, Dulce de Jesus Soares, hatete utilizasaun eskola Ensinu Sekundáriu Jerál (ESJ) iha suku Lisadila, postu administrasaun Loes, munisípiu Likisá nu’udar kompeténsia Servisu Edukasaun husi munisípiu referidu.
Tanbasá seidauk utiliza, Servisu Edukasaun Munisípiu Likisá, Júlia da Silva, hatán.
“Seidauk utiliza ho razaun prosesu aprendizajen seidauk la’o dook husi komunidade ne’ebé hela iha uma MDG”, Júlia klarifika ba TATOLI via telefonika.
Nia hatutan konstrusaun eskola ho saladeaula neen, sala ba manorin ida, kompleta ho kazadebañu finaliza iha 2020 no daudaun ne’e ninia parte prepara ko’alia ho inan-aman sira, autoridade komunitária hodi loke eskola referida.
Ministra Edukasaun, Dulce de Jesus Soares, dehan bainhira konstrusaun eskola iha munisípiu sira mak finaliza no entrega ona. Signifika, utilizasaun ne’e kompeténsia edukasaun munisipál.
“Prátika ne’ebé ami halo iha Ministeriu Edukasaun lalika hein ba prosesu inaugurasaun, más hetan ona bensaun ruma, loke ona eskola ne’e para uza, la presiza halo festa boot ida, maibé uza daudaun ona, depois serimónia tempu tuir mai laiha problema”, Ministra Dulce hatete iha INFORDEPE Balide, tersa ne’e.
Notísia relevante: Projetu konstrusaun eskola 2024 atinji ona pursentu 40
Jornalista : Osória Marques
Editora : Rita Almeida
