Ezekusaun OJE iha FDCH atinje pursentu kuaze 30
DILI, 29 Maiu 2025 (TATOLI)-Ezekusaun Orsamentu Jerál Estadu (OJE) 2025 ba trimestre dahuluk iha Fundu Dezenvolvimentu Kapitál Umanu (FDCH, sigla portugés) atinje pursentu kuaze 30.
“Ami ezekuta ona 29,95%. Husi pursentu ne’e gasta kuaze rihun $5-resin”, Diretór Ezekutivu FDCH, Júlio Aparício, ba TATOLI iha ninia servisu fatin Kolmera, kinta ne’e.
Diretór Ezekutivu hatete, ida-ne’e ba propina bolseiru sira-nian, ba formasaun téknika, formasaun profesionál hanesan Sekretáriu Estadu Formasaun Profisionál Empregu (SEFOPE), Polísia Nasionál Timor-Leste (PNTL), FALINTIL-Forsa Defeza Timor-Leste (F-FDTL) ne’ebé to’o horiseik ezekuta ona 29,95%.
“Espera katak Juñu iha segundu trimestre ami bele ezekuta ona 50% tanba agora ami prosesu hela ba bolseiru halo estudu iha Malázia no Indonézia”, dehan nia.
Alende ne’e FDCH mós halo pagamentu ba bolseiru sira rai-laran hanesan bolsa parsiál nian ba ema ne’ebé laiha kbiit ekonomia.
“Ami mós sei halo pagamentu ba bolsa rai-laran, liuliu bolsa hakbiit ne’ebé muda ba bolsa parsiál tanba foin fulan ida mak sira asina kontratu bá tinan ida ne’e, ami sei halo pagamentu ba sira hanesan propina iha Universidade Dili, Universidade Nasionál Timor Lorosa’e, Institutu Siénsia Saúde, Institutu Saúde Kristál no universidade sira seluk.
FDCH nia proposta orsamentu ba tinan 2025 hamutuk $18.973.544, ne’ebé mak sei finansia ba atividade 51, iha programa prinsipál haat mak hanesan formasaun profisionál ho nia orsamentu $1.223.780 ne’ebé sei finansia atividade tolu, formasaun téknika ho nia orsamentu $2.051.682 sei finansia atividade 16, bolsa estudu ho nia orsamentu $13.956.821 sei finansia ba atividade 30 no funsionamentu no dezenvolvimentu institusionál ho nia orsamentu $1.741.261.
Notísia relevante: FDCH tinan oin prioriza bolsa estudu ba espesialista iha área oin-oin
Jornalista : Osória Marques
Editora : Rita Almeida
