DILI, 10 Juñu 2025 (TATOLI)–Governu liuhusi Vise Primeiru-Ministru (PM) no Ministru Koordenadór Asuntu Sosiál Dezenvolvimentu Rurál Abitasaun Komunitária, Mariano Assanami Sabino, simu vizita husi Embaixadór Kamboja iha Timor-Leste, Chun Sovannarith, hodi diskute kona-ba kooperasaun entre nasaun rua.
“Ita apresia tebes ho Timor-Leste nia serbisu badinas no maka’as hodi kumpre rekezitu ne’ebé ASEAN estabelese, tanba ne’e ha’u lori líder sira iha Kamboja, kongratula ba Estadu Timor-Leste tanba Timor prepara-an atu sai membru plenu iha ASEAN fulan-Outubru mai,” Embaixadór hato’o ba jornalista sira hafoin ramata ekontru ho Vise PM Assanami, iha Palásiu Governu, Tersa ne’e.
Diplomata ne’e dehan, Kamboja sempre suporta Timor-Leste liuhusi Prezidente no Parlamentu Kamboja ne’ebé iha konsisténsia tebes.
“Timor-Leste nia susesu hanesan mós Kamboja nia susesu. Agradese mós ba Governu no Parlamentu Timor-Leste nia suporta maka’as ba atividade ekonómika sira-ne’ebé hala’o iha Kamboja tanba Timor-Leste hanesan nasaun ida iha rejiaun ne’ebé halo ita moris hakmatek no trankilidade nia laran,” nia akresenta.
Notísia relevante : Hun Sen partilla razaun estratéjika ba adezaun Kamboja iha ASEAN ba membru PN
Kamboja mós nafatin suporta Timor-Leste tanba fiar katak pás maka dalan loos no pás ne’ebé Timor-Leste iha hanesan mós pás ne’ebé Kambodia iha to’o agora.
“Ita sei serbisu hamutuk ho Timor-Leste nu’udar família ida husi ASEAN, ita fiar katak bainhira hetan membru plenu, ita sei kontinua ho programa ASEAN to’o tinan 45 mai,” nia informa.
Tuir Diplomata ne’e, bainhira Timor-Leste sai ona membru asosiasaun la’ós de’it atu fó benefísiu ba Timor-Leste maibé mós ba membru ASEAN tomak. Aleinde ne’e, Timor-Leste mós tempu to’o ona atu susesu, katak dezenvolvimentu iha Timor daudaun ne’e kapas no iha mudansa, konsentra ba rekursu umanu hotu iha kapitá.
“Tanba la’ós de’it ida-ne’e, ba futuru sei mudansa liután nia dezenvolvimentu. Tanba ne’e ami apresia tebes dezenvolvimentu fíziku hanesan infraestrutura sira-ne’ebé ami haree daudaun no rekursu umanu, hanesan Dili agora nakonu ho ema hanesan nasaun seluk,” nia reforsa.
Kontinua eleva setór agrikultura
Iha sorin seluk, Embaixadór Chun Sovannarith, husu Timor-Leste atu kontinua eleva in setór agrikultura iha territóriu nasionál.
“Ita lembra filafali iha fulan kotuk bainhira eis-Ministru Kamaboja mai iha Timor-Leste ne’e tanba akordu ne’ebé iha entre rai rua ne’e, nune’e Kamboja sei suporta nafatin ai-han hodi suporta setór agrikultura iha ne’e,” Embaixadór katak.
Nia nota, Timor-Leste nia progresu iha agrikultura ne’e maka’as tebes maibé presiza eleva maka’as liután liuhusi kooperasaun bilaterál hodi fó oportunidade di’ak liután.
Daudaun ne’e Kamboja iha planu atu lori produtu sira husi Kamboja mai Timor-Leste tanba agrikultura ne’e hanesan setór importante ida hodi suporta setór ekonomia rai-laran.
“Ami hein katak loron ruma produtu sira iha Timor-Leste bele bá kamboja no produtu sira iha Kamboja sei haruka mós mai iha Timor-Leste,” nia katak.
Jornalista : Alexandra da Costa
Editora : Julia Chatarina
