OEKUSI, 10 Juñu 2025 (TATOLI) –Ekipa Konjunta FALINTIL-Forsa Defeza Timor-Leste (F-FDTL) no Polísia Nasionál Timor-Leste (PNTL), hafoin halo idetifikasaun ba mate-isin membru ativu komponente Navál, Reinaldo Ximenes, transporta bá mortuáriu Ospitál Referál Oekusi.
Tuir planu, aban loron Kuarta, 11 Juñu 2025, mate isin membru komponente navál ne’e sei translada iha Dili no sei la halo autopsia tanba iha idetifikasaun membru ne’e tiru-aan duni.
Notísia relevante:Komandu F-FDTL sei investiga motivu membru Reinaldo Ximenes mate iha Oekusi
“Ami koordena ona bá Dili, ró sei lori kaixaun mai to’o aban dadersan, lokraik sai husi ne’e bá fali Dili iha loron kinta. Ne’ebé sei laiha autopsia tanba depende ami haree katak nia tiru-aan duni ka la’e, kuandu nia tiru-an entaun laiha autópsia maibé ohin ami haree matebian mate tiru-aan duni,” Komandante Komponente Navál FALITNIL-Forsa Defeza Timor-Leste (F-FDTL), Komodoro Higino Das Neves, dehan iha Oekusi, ohin.
Nia esplika, kilat ne’ebé matebian uza komando komponente navál sei uza nafatin, tanba matebian la halo prátika krime, kuandu uza kilat ne’e ba tiru ema, entaun tenke asegura iha PNTL, maibé kilat ne’ebé uza, matebian nian rasik, agora nia tiru-aan, entaun asegura tau iha armazein komponente navál nian.
“Agora parte PNTL sei haree tanba kilat karegadór laiha, ne’e mak ami deskonfia ona, nia (matebian) planu oho an ne’e, subar tiha kilat musan ida iha nia bolsu, ohin nia bele tama iha kuartu, depois nia karrega to’o tiru-aan, ami agora deskonfia ida-ne’e, maibé ekipa sei haree no buka karregadór laiha, maibé ami ka’er ona nia telefone, atu ami bele haree kle’an liu, nia kontaktu ho sé, ka problema ho ema ruma, ne’ebé ami agora sei hein relatóriu husi parte investigasaun atu entrega mai ha’u, maibé ohin la deteta buat ida, sira só investiga de’it kuandu ita autopsia, signifika ema tiru ka, maibé ita la deskonfia ona,” nia afirma.
Maski nune’e, Komandante Komponente Navál ne’e sente triste tanba foin akontese dahuluk ba komponente navál, ne’ebé mate tanba tiru-aan.
Tanba ne’e, nia promete sei koordena ho lia-na’in sira iha Oekusi inklui parte igreja atu halo rituál no bensaun, nune’e fatin ne’ebé membru F-FDTL sira hel hetan matak malirin hodi hala’o servisu nasaun nian.
Entretantu, Jornalista Ajénsia Tatoli,I.P tenta konfirma asuntu ne’e ho parte Komandu PNTL Oekusi, maibé komandante daudaun ne’e hala’o hela servisu iha nasionál Dili.
Notísia relevante:Breaking News: Membru F-FDTL ida mate ho mistériu iha Oekusi
Jornalista: Abílio Elo Nini
Editór: Florencio Miranda Ximenes
