ME ezkuta ona pursentu 42 hosi OJE 2025
DILI, 10 Juñu 2025 (TATOLI)-Ministériu Edukasaun (ME) liuhosi Diresaun Nasionál Administrasaun no Finansa ezekuta ona pursentu 42 hosi totál Orsamentu Jerál Estadu (OJE) 2025 alokadu iha meadu segundu trimestre.
“Iha Ministériu Edukasaun nia ezekusaun en-jerál pursentu 42, ekivalensia ba oramentu $47, 278, 478. Ida-ne’e mak ita atinje ninia ezekusaun to’o horisehik”, Diretór Nasionál Administrasaun no Finansa, José dos Santos, ba TATOLI iha nia knaar fatin Vila Verde, tersa ne’e.
Responsável ne’e garante katak iha trimestre daruak nia rohan bele atinje to’o pursentu 50. “Ita iha ona fim segundu trimester, signifika to’o iha segundu trimestre ita ita bele apezenta katak ita bele ezekuta 50%”, nia espera.
Nia dehan alokadu OJE 2025 iha $113,348,784, ne’e fahe ba kategória lima iha Ministériu Edukasaun nian.
“Husi orsamentu ida-ne’e ita fahe ba kategória lima. Ida mak kategória orsamentál ba saláriu no vensimentu hamutuk $983, 226 ho nia ezekusaun ne’ebe ita iha husi Janeiru to’o mai horiseik atinje 43%. Ba kategória bens e servisu ho osan $10,731,334, hahú husi Janeiru to’o horiseik atinje ona 49%”, nia esplika.
Nia hatutan ba kategória transferénsia públika ho osan ne’ebé alokadu $4, 682,80 nia ezekusaun mós atinje ona pursentu 46. Ba kategória kapitál menór osan $1,54,214, nia ezekusaun atinje pursentu sia.
“Maibé restante balun tama ona prosesu aprovizionamentu, entaun nia balansu ne’ebé ba iha kapitál menór mesmu ninia ezekusaun pursentu sia, maibé sira seluk tama ona iha prosesu nia laran, balansu ne’ebe iha hela pursentu lima”, nia dehan.
Kapitál dezenvolvimentu orsamentu ne’ebé mak alokadu $3,897,930 nia ezekusaun to’o horiseik atinje ona pursentu 31. Maibé husi kategória ne’e iha 11% mak prosesu la’o ona, ne’ebé sei iha 50% mak sai hanesan balansu ne’ebé presiza sei ezekuta Jullu to’o Dezembru.
Notísia relevante: Ezekusaun OJE 2025 iha trimestre dahuluk atinje 24,2%
Jornalista : Osória Marques
Editora : Rita Almeida
