DILI, 12 Juñu 2025 (TATOLI)-Diretór Servisu Edukasaun Munisípiu Ainaru, Patrício da Costa Magno, informa Ensinu Báziku Sentrál (EBC, sigla portugés) rua iha munisípiu Ainaru mak hahú ona hatais uniforme eskolár.
“Kona-ba uniforme eskolár iha Ainaru hamutuk rua hanesan EBC Agapito Da Costa Ailora no EBC Quatro Monthanas, eskola seluk seidauk”, nia hatete ba TATOLI via telefone, ohin.
Dirijente ne’e hatutan uniforme ne’e konkordansia entre eskola ho kompañia hodi prepara no suku ba estudante sira.
“Ita-nia estudante hatama $13 kada estudante”, afirma.
Uniforme eskolár ba ensinu báziku sira iha oin ida mak alunu sira sosa inklui imblema no gravata.
Patrício hatutan eskola seluk ne’ebé seidauk ne’e sei buka hela kompañia hodi fornese. “Espera eskola hotu-hotu iha Ainaru bele uniformiza lalais”.
Totál eskola bazika no filiál iha Ainaru hamutuk 93, ho ninia estudante 18.808, pre-eskolár 47 ho nia alunu 2.136, sekundáriu lima no iha estudante 3.324, no tékniku vokasionál haat no nia estudante 517.
Uniforme eskolár ne’e lansa ona iha 20 Dezembru 2024, ne’ebé partisipa direita hosi Primeiru Ministru (PM), Kay Rala Xanana Gusmão.
Notísia relevante: Eskola 17 iha Ainaru mak asesu ona merenda eskolár
Jornalista : Osória Marques
Editora : Rita Almeida
