DILI, 12 juñu 2025 (TATOLI)–Primeiru-Ministru (PM), Kay Rala Xanana Gusmão, akompaña durante reuniaun ministeriál entre PALOP-TL no Uniaun Europeia (UE) ba dala-XV iha Ministeriu Negósiu Estranjeiru no Kooperasaun (MNEK), iha pesoál balun halo tentativa sabotajen hodi impede atividade, nune’e Xefe Governu husu atu halo investigasaun kle’an.
“Foin lalais ita simu PALOP, ha’u hirus uitoan, maibé Ministru Negósiu Estranjeiru dehan katak iha sabotajen iha Ministeriu rasik, iha ema balun mak hakarak halo hodi provoka,” Xanana hateten ba jornalista sira iha Palásiu Prezidensiál, bairru Pité Kinta ne’e.
Tanba ne’e, iha reuniaun Konsellu Ministru Kuarta (11/06), membru Governu sira diskute ona atu halo investigasaun kle’an ba pesoál ne’ebé halo tentativa sabotajen atividade liuhusi hamate ekran ne’ebé tau durante reuniaun.
“Ema ne’ebé halo sabotajen la’ós timoroan, ita bolu tia ema mai husi li’ur, ko’alia halo ekran iha oin atu la’o ba la la’o, ida-ne’e dehan la’ós primeira vez, maibé okaziaun seluk mós akontese nune’e,” Xanana lamenta.
Notísia relevante : Timor-Leste ofisialmente simu prezidénsia polítika PALOP-UE husi Guiné-Bissau
Xefe Governu dehan, tuir informasaun ne’ebé Ministru Bendito Freitas hato’o katak antes ne’e iha pesoál balun tenta ko’a fiu liña internet.
“Ministru dehan, antes ne’e iha ema balun mós ko’a tia fiu internet, halo buat ne’e la la’o, entaun ita tenke halo investigasaun kle’an, atu nune’e bele hasai tia sabutadór ne’e. Ita sei husu ba Servisu Nasionál Intelijénsia (SNI) no parte hotu atu haree didi’ak, sé mak halo buat ne’e, sé mak laiha kompromisu hodi serví rai ne’e hasai tia,” nia katak.
Rekorda fali katak, iha semana kotuk bainhira iha atividade enserramentu reuniaun ministeriál PALOP-TL no UE, transmisaun labele la’o ho susesu tanba ekraun ne’ebé leno iha oin hodi fasilita líder sira husi nasaun li’ur ko’alia tenke kotu no la funsiona ho di’ak, ne’ebé obrigadu atividade ne’e para iha klaran.
Aleinde ne’e, iha ema deskoñesidu balun ko’a fiu internet husi Ajénsia TATOLI nian ne’ebé momentu ne’ebé atu halo transmisaun direta ba ativiade ne’e.
Jornalista : Hortencio Sanchez
Editora : Julia Chatarina
