DILI, 17 Juñu 2025 (TATOLI)–Sekretaria Estadu Komunikasaun Sosiál (SEKOMS) serbisu hamutuk ho Ajénsia Teknolojia Informasaun no Komunikasaun, Institutu Públiku (TIC Timor, I.P) fó formasaun ba ajente mídia komunikasaun sira kona-ba utilizasaun sistema Diseminasaun Informasaun Integradu (SDII).
Diretór Jerál SEKOMS, Ferdino da Costa, hateten, objetivu husi formasaun ne’e atu introdús sistema diseminasaun integradu ba mídia sira atu fasilita serbisu entre mídia ho instituisaun sira seluk bainhira atu marka audiénsia ba atividade ruma.
“Bainhira atividade ida iha instituisaun no sira atu konvida mídia halo kobertura la presiza uza karta ona, maibé sira bele informa konvite liuhusi sistema plataforma online,” Diretór informa ba jornalista sira iha salaun Maria Gorrete iha Serkretaria Estadu ba Igualdade (SEI), Kaikoli, Tersa ne’e.
Notísia relevante : TIC Timor organiza semináriu hodi troka ideia kona-ba transformasaun dijitál
Nia dehan, sistema ne’e bele redús surat-tahan, kombustível ba transporte no tinta ba printer sira. Tanba ne’e mak iha programa IX Governu SEKOMS prioriza programa ne’e hodi fasilita informasaun ba públiku.
“Aleinde ne’e, ami fó ona formasaun ba rádiu komunidade sira tanba ita hotu nia serbisu atu habelar informasaun. Nune’e, sira presiza hatene sistema ida-ne’e,” nia akresenta.
Formadór TIC Timor, Tiago dos Santos Fernandes, hateten, atividade formasaun ne’e atu ita bele hasa’e koñesimentu, liu-liu mídia ida-idak hodi utiliza no jere rasik sistema diseminasaun informasaun integradu atu fasilita serbisu administrasaun marka audiénsia.
“Matéria espesífiku ne’ebé ita fó ba formandu sira maka oinsá atu utiliza sistema ida-ne’e, liu-liu atu kria ajendamentu ba pedidu audiénsia liuhusi sistema online. Atu nune’e formasaun ne’e hotu sira bele jera rasik,” Formadór esplika.
Sistema ida-ne’e fó oportunidade ba pontu fokál parte Governu no mídia ne’ebé rejistadu iha SEKOMS, inklui ajendamentu sira sei arkivu mós iha sistema ne’e rasik.
“Sistema diseminasaun informasaun integradu ne’e bele asesu liuhusi telemóvel, komputadór no instrumentu komunikasaun seluk, importante tenke iha koneksaun ba internet,” nia tenik.
Ajénsia TIC Timor, IP garante seguransa ba sistema ne’e rasik tanba parte tékniku sira halo ona teste ba sistema ne’e molok atu implementa.
Formandu husi SEI, Emanuel Barros, hateten, sistema ne’e bele fó benefisiu ba utilizadór sira atu fasilita serbisu mídia bainhira atu habelar informasaun ba públiku.
“Entaun ita tenke aprende ona hodi jere rasik sistema ne’e, maski fasilidade balun ladún kompletu maibé nafatin agradese tanba ho sistema avansadu bele ajuda ona ita,” nia hato’o.
Atividade ne’e hetan partisipasaun husi instituisaun jestór mídia, media officer instituisaun Estadu, membru TLPU, inklui membru AJTL.
Jornalista : Alexadra da Costa
Editora : Julia Chatarina
