Estudante DIT prefere Governu investe iha setór turizmu no edukasaun
DILI, 20 Juñu 2025 (TATOLI)—Estudante departamentu akuntabilidade husi Dili Intitute of Technology (DIT), Domingos Ronaldino dos Santos da Costa, prefere Governu investe iha setór turizmu nu’udar vizaun estratéjika ida husi Planu Estratéjiku Dezenvolvimentu (PED) iha Timor-Leste.
“Governu presiza investe iha setór turizmu no hadi’a fasilidade sira hodi bele atrai turista sira mai vizita. Ho era ida agora turista barak mak entuzias vizita fatin turizmu sira. Tanba ne’e mós alternativa di’ak ida hodi ajuda fó kontribuisaun ba Estadu atu hadi’a marketing di’ak no bele hetan reseita liuhusi setór turizmu,” Estudante informa ba Ajénsia TATOLI, iha salaun DIT, Manleuana, Sesta ne’e.
Notísia relevante : Lere dezafia implementasaun PED no defende prioridade ba edukasaun kualidade
Estudante ne’e nota, investimentu ba edukasaun mós hahú iha mudansa liuhusi teknolojia avansadu, ne’ebé bele fasilita ona estudante sira-nia aprendizajen tanba konseitu Estadu ne’ebé independente presiza eleva setór sira sai forte.
Tuir estudante ne’e, bainhira ema ida duni hela nia títulu tenke hala’o tuir objetivu ne’ebé iha hodi serví nasaun no família.
“Sai joven ida labele depende de’it ba Governu maibé oinsá ita iha rasik alternativa hodi fó kontribuisaun ba dezenvolvimentu nasionál. Tanba ne’e, iha PED 2011-2030 iha mudansa ba kapitál Dili hanesan infraestrutura ne’ebé daudaun ne’e IX Governu trasa hela,” nia akresenta.
Iha sorin seluk, Estudante, Carmen Intan Sridevi Chang, observa, vizaun PED nian daudaun ne’e iha mudansa husi setór oinoin.
“Governu tenke tau prioridade ba setór edukasaun atu kontinua investe nafatin iha rekursu umanu, tanba husi edukasaun mak ema bele hatene siénsia hodi halo dezenvolvimentu ba rai ida-ne’e no presiza hadi’a setór edukasaun atu minimiza ema ba eskola iha rai- li’ur,” nia rekomenda.
Estudante ne’e dehan, hanesan joven ida tenke aproveita didi’ak oportunidade tanba hanesan jerasaun foun presiza iha hanoin ne’ebé maduru hodi kontinua fó kontribuisaun ba dezenvolvimentu nasionál iha Timor.
Nune’e mós, Estudante, Elisio Salegiano, hato’o, iha era agora presiza halo buat ne’ebé define ka la’o ona.
“Ita presiza kria rasik ita-nia istória hodi fó kontribuisaun ba nasaun ida-ne’e, katak vizaun ne’ebé mak ita tau iha planu presiza realiza hodi kria dezenvolvimentu no hatan ba nesesidade públiku. Entaun mudansa ne’ebé iha tanba PED ne’ebé Governu define ona,” Estudante ne’e tenik.
Elisio katak, bainhira nasaun hakarak dezenvolvimentu ne’e kontinua atinje, presiza tau-matan ba setór edukasaun atu forma ema sai rekursu di’ak ba nasaun hodi kontinua hasa’e dezenvolvimentu di’ak liután iha futuru mai.
Jornalista : Alexandra da Costa
Editora : Julia Chatarina
