Komunidade Kailaku ezije Governu aselera prosesu reabilitasaun estrada Kailaku-Bilimau
BOBONARU, 23 Juñu 2025 (TATOLI)—Komunidade Kailaku ezije parte kompetente atu aselera prosesu reabilitasaun estrada iha postu administrativu Kailaku, munisípiu Bobonaru liga ba área Bilimau, postu administrativu Hatulia, munisípiu Ermera, tanba kondisaun fíziku atuál ne’e aat grave no difikulta tebes movimentu públiku liuliu tempu udan.
“Ami-nia estrada ne’e prosesu to’o iha ne’ebé ona lahatene loos. Tinan kotuk liu ba Konsultan ida mai sukat tiha, mais to’o agora la rona iis. Tuir loloos labele sukat tan ona, uza dadus tuan ne’e mak kontinua de’it ona tanba estrada Kailaku ne’e uluk pernah atu halo buat hotu loos ona. Maibé la jadi muda fali ba Manatutu tanba problema. Tanba ne’e mak ami husu aselera ninia prosesu para tinan oin ne’e bele halo ona. Se lae, ami Kailaku ne’e tinan-tinan terus hela de’it ba estrada,” Reprezentante Komunidade Kailaku, Julito Pereira Afonso, informa ba Agência Tatoli, iha aldeia Samutaben, suku Manapa, postu Kailaku, munisípiu Bobonatu, segunda ne’e.
Nia afirma, Governu presiza tau matan ho sériu tanba tempu udan ne’e, estrada ne’e nakfilak sai hanesan mota hodi udan-been sira suli tuir.
“Bee suli tuir fali estrada laran. Ezemplu, iha ponte Samutaben nian ne’e, depois tesik ba Marco ne’e, kuandu udan ne’e motor ho karreta liu araska. Tanba bee nalihun fali iha estrada laran, ida-ne’e mak ami povu hotu iha Kailaku preukupa.” nia dehan.
Aleinde ne’e, Komunidade Bendita Moniz Amarál reforsa katak problema ne’e afeta ba agrikultór sira atu transporta produtu lokál ba ba faan merkadu Maliana no seluk tan.
“Ami iha ai-fuan, sabraka, ai-dila, hudi, depois ai-han hanesan batar, fehuk, fore-mungu ho modo, bai-loro hanesan ne’e ami sei lori netik ba merkadu hetan osan oan ruma. Maibé iha tempu udan ne’e la di’ak tanba ami-nia ai-fuan sira ne’e balu to’o estraga de’it tanba dalan ita liu la di’ak ne’e. Tanba ne’e, ami husu favór boot ba Governu hadi’ak netik ami-nia estrada ne’e, nune’e ami mos sente kontente ita ukun-aan ida-ne’e,” nia dehan.
Motorista Kamioneta, Manuel de Jesús Pinto, rekomenda ha Governu tau prioridade no prevee iha orsamentu Jerál Estádu tinan 2026, nune’e bele rezolve preokupasaun komunidade Kailaku.
“Se Estadu, Governu la hadi’ak lalais, tinan idaka rúa mai tan, ita liu ba-mai ladi’ak ona. Tanba Ponte, saluran sira tun ba ne’e aat hotu ona, entaun loke dalan fali ba bee husi mota suli tuir fali estrada laran. Tanba, udan ne’e motor ho kareta k’ik sira liu susar loos,” nia dehan.
Enkuantu, tuir dadus monografía Autoridade Munisípál Bobonaru iha tinan 2022 hatudu katak postu Administrativu Kailaku iha aldeia 24, suku ualu (8) ho totál populasaun 10,347 no xefe familia 2,107.
Notisia Relevante: Komunidade preokupa bee-mota nakfilak estrada Cailaco sai fali mota
Jornalista : Sergio da Cruz
Editór : Cancio Ximenes
