Komunidade preokupa bee-mota nakfilak estrada Cailaco sai fali mota
BOBONARO, 27 janeiru 2025 (TATOLI)—Komunidade Cailaco preokupa ho kondisaun estrada liga husi kapitál Maliana ba postu administrativu Cailaco, munisípiu Bobonaro, tanba bainhira akontese udan ne’e bee-mota suli tuir no nakfilak estrada sai fali mota.
Reprezentante komunidade Cailaco, Bendito Mau, hateten iha tempu udan ne’e kondisaun estrada ne’e grave tebes, ne’ebé difikulta tebes movimentu transporte públiku, transporte privada no movimentu ema la’o ba-mai.
Notísia Relevante: Komunidade halerik bá kondisaun estrada urbana Cailaco-Maliana
“Udan ne’e ami pasiénsia de’it ona, sai ba-mai mós ladí’ak. Ita haree hansan mota mak muda sa’e mai tíha fali iha estrada, tanba bee-mota nakonu Estrada. Estrada ne’e, kamioneta sira-ne’e mós liu ladi’ak, Satán, motorizada sira-ne’e, ita kuandu tama obriga ne’e, bee lori ita kedas. Ida-ne’e mak halo ami hansan povu triste. Ami-nia estrada a’at tíhaa, agora bee mai tama nakonu tan estrada, ami araska tebe-tebes. Na’i-ulun sira favór tau-matan netik ba,” nia informa ba Agência TATOLI iha merkadu Maliana, segunda ne’e.
Administradór postu administrativu Cailaco, Rodolfo da Cruz, reforsa bee ne’e naksulin iha estrada laran mai husi mota-oan kuaze 10-resin, hahú husi Samutaben ba to’o Bilimau tanba laiha ponte no bee-dalan barak mak hetan estragu totál.
“Mota oan sira-ne’e emvezde atu la’o tuir dalan lae, bee fahe ka sulu tuir estrada mak barak liu. Ita haree hanesan estrada ne’e nakfilak sai mota, difikulta transporte publiku no privada atu liu no liuliu komunidade iha Cailaco atu lori sira-nia produtu lokál atu mai iha Maliana, ba Ermera no ba liu Dili,” nia dehan.
Nia hatutan, problema ne’e halo estrada diresaun Maliana ba Cailaco grave liután, tanba hafoin udan nakonu ho sedimentasaun.
Administradór postu ne’e haktuir, iha tinan kotuk nia parte hamutuk ho xefe suku na’in-ualu (8) iha aldeia ualu (8) ne’e hato’o direta ona problema ba Xefe Gabinete Ministériu Obra Públika, tanba kondisaun fiziku estrada Cailaco kuaze aat totál.
“Nia dezeñu sira submete hotu ona, hein de’it desizaun husi Ministériu Obra Públika, ami espera katak iha 2025 ne’e Governu bele iha planu, nune’e atu bele tau-matan ba iha estrada Cailaco,” nia dehan.
Tuir imformasaun ne’ebé Agência Tatoli asesu, antes ne’e Governu fó ona prioridade ba ona reablitasaun no normalizasaun estrada husi Cailaco ba to’o Bilimau, maibé projetu ne’e la konsege implementa tanba hetan impedimentu husi ema balun.
Notísia Relevante: PAM sei ko’alia ho MOP rezolve estrada Cailaco-Bobonaro no Lolotoe
Jornalista : Sérgio da Cruz
Editór : Cancio Ximenes
