DILI, 24 Juñu 2025 (TATOLI)–Governu liuhusi Sekretaria Estadu Asuntu Toponímia no Organizasaun Urbana (SEATOU) alerta ba kondutór baskulante sira-ne’ebé tula rai-henek no fatuk iha mota-laran atu taka ho lona bainhira lori tama ba sidade laran.
Sekretáriu Estadu Asuntu Toponímia no Organizasaun Urbana, Germano Santa Brites Dias, hateten, SEATOU iha fulan hirak liubá hasai ona regulamentu rigorozu no fahe ona ba kondutór baskulante sira.
“Tula rai-henek no fatuk tenke taka lona iha leten bainhira karreta tatidik karik rai-henek labele monu sai no sira tula mós tenke sukat labele nakonu liu para evita fakar iha estrada laran,” Sekretáriu Estadu informa hafoin halo vizita ba instalasaun kompañia Caltech iha Beduku, Tersa ne’e.
Aleinde ne’e, kondutór mós tenke pasa revista ba karreta nia odomatan kotuk ne’ebé presiza taka metin para rai-henek no fatuk labele fakar sai.
“Bainhira kondotór sira la kumpre no ami hetan, otomátikamente ami tenke fó sansaun ba sira liuhusi prega multa. Regulamente ne’e sempre kontinua la’o no kona-ba multa ne’e kestaun tékniku parte gabinete mak iha kompeténsia hodi fó sansaun,” nia akresenta.
Notísia relevante : Despezu administrativu segunda faze, Komunidade afetada Bekora prefere diálogu
Iha sorin seluk, Kondutór karreta baskulante, Aquino Pereira, admite, antes ne’e SEATOU fó ona karta ba kondutór tula rai-henek no fatuk, nune’e kondutór sira mós tuir ona enkontru iha Has-Laran, Manleuana, hodi hatene katak bainhira rai-henek fakar iha estrada laran bele fó impaktu ba transporte seluk no halo poluisaun.
“Hanesan sidadaun timoroan ami koopera ho Governu atu tula rai-henek no fatuk sira tenke taka lona, nune’e rai-henek labele fakar tutuir dalan. Maibé baibain ami tula la taka lona ne’e tanba tula ho kuantidade naton,” Kondutór katak.
Antes kondutór sira atu tula rai-henek ka fatuk ruma mós tenke pasa revista odamatan kotuk tenke xave metin sela’e rai-henek sai tuir kuak, nune’e bele fó impaktu ba motorista sira-ne’ebé halo movimentu husi kareta kotuk no kondutórsira mós sempre prepara tali ka lona iha kareta laran.
“Ami husu ba Governu atu estabelese estasionamentu ida ba karreta baskulante iha mota ninin, nune’e ami bele para ho formadu,” nia sujere.
Jornalista : Alexandra da Costa
Editora : Julia Chatarina
