UCT ba dahuluk despede estudante na’in-76 tuir prátika laboratoriál iha Indonézia
DILI, 24 Juñu 2025 (TATOLI)–Universidade Katólika Timorense (UCT, sigla portugés), Tersa ne’e, ba dahuluk realiza atividade despedida ba estudante na’in-76 husi departamentu medisina molok desloka bá halo formasaun prátika laboratoriál pre-klínika iha Universidade Katólika Indonézia Atmajaya no Universidade Crista Krida Wacana (UKRIDA).
Estudante sira-ne’e sei halo formasaun ho forma rua hanesan prátika no teoria ne’ebé sei hala’o durante semana ualu, hahú husi loron 01 Jullu to’o 28 Agostu 2025.
Arsebispu Metropolitana Arkiodioseze Dili, Dom Virgílio Kardeál do Carmo da Silva, sente orgullu tanba ba dahuluk grupu ne’ebé estuda iha área medisina, ne’ebé kompleta ona teoria iha ne’e, sei kontinua halo prátika laboratoriál iha universidade boot rua, iha Jakarta, Indonézia.
“Ami agradese ba universidade rua ne’e tanba nakloke hodi simu ami-nia estudante sira. Nune’e, husu ba estudante sira atu aprende no aproveita didi’ak esperénsia ida-ne’e tanba sira bá la’ós lori sira-nia naran maibé reprezenta timoroan no UCT, bele sai médiku ne’ebé di’ak ba aban bainrua,” Arsebispu informa ba jornalista sira iha salaun UCT, Balide.
Nune’e mós, tuir Reitór UCT, Joel Casimiro Pinto, hateten, estudante sira labele iha de’it koñesimentu iha teoria maibé tenke aplika mós liuhusi prátika.
Nia dehan, medisina nia objetivu mak atu halo tratamentu ba ema maibé presiza ekipamentu.
“Timor seidauk iha. UCT iha ona ekipamentu balun hanesan laboratóriu lima maibé presiza tan tolu, entaun ida-ne’e mak ita presiza ema seluk ninia kontribuisaun. Tanba ne’e mak ita haruka estudante sira bá universida rua iha Jakarta ne’ebé kualidade iha Indonézia hodi tulun estudante sira hakle’an sira-nia koñesimentu liuhusi prátika no aprefesoa sira-nia skill,” nia akresenta.
Notísia relevante : Estudante UCT na’in-ualu sei hala’o estájiu iha Xina
Estudante na’in-76 ne’e kompostu husu feto 52 no mane 24, ne’ebé fahe ba universidade rua ho kuantidade ne’ebé balansu, kada universidade destaka estudante na’in-38. Nune’e fatin ne’e bele fó espasu ba sira hodi akumula hotu kedas estudante sira.
“Ita espera hafoin estudante sira termina ona sira-nia prátika bele fila mai aplika fali sira-nia koñesimentu, aleinde ne’e sira mós sei kontinua estudu semestre rua tan,” nia katak.
Molok estudante sira termina estudu iha tinan 2026 sei entrega bata mutin ba sira.
“Signifika katak sira simu ona knaar ida nu’udar médiku joven, maibé médiku joven ne’e tenke hala’o tan nia formasaun ko asisténsia ho supervizaun husi dosente seniór sira,” nia tenik.
Atividade despedida sira partisipa husi Ministru Ensinu Superiór, Siénsia no Kultura, José Honório, Embaixadór Indonézia iha Timor-Leste, Okto Dorinus, parte igreja, estrutura UCT no estudante sira.
Jornalista : Alexandra da Costa
Editora : Julia Chatarina
