DILI, 26 Juñu 2025 (TATOLI)–Sekretáriu Estadu Komunikasaun Sosiál, Expedito Loro Dias Ximenes hamutuk ho Diretór Jerál Sekretaria Estadu Komunikasaun Sosiál (SEKOMS), Florindo da Costa, no Xefe Gabinete interinu, Julio Manuel Coreia, halo avaliasaun dezempeñu kada fulan-neen ba funsionáriu kontratadu na’in-140 husi diresaun neen.
Funsionáriu sira ne’ebé serbisu ona iha SEKOMS durante tinan-ida destaka ba Diresaun Jerál, Diresaun Esternál Administrasaun Finansa, Diresaun Nasionál Aprovizionamentu no Lojístiku, Diresaun Nasionál Diseminasaun Informasaun, Diresaun Nasionál Dezenvolvimentu Mídia no Diresaun Nasionál CEFTEC.
“Ohin ha’u mai halo enkontru ho funsionáriu kazuais sira hamutuk 140 husi diresaun neen no enkontru ne’e ho objetivu atu esplika ba sira kona-ba polítika IX Governu nian. Aleinde ne’e, ha’u aproveita mós ba sira durante tinan-ida sira sai funsionáriu kazuais iha SEKOMS,” Sekretáriu Estadu Komunikasaun Sosiál, Expedito Loro Dias Ximenes, informa iha salaun Maria Gorrete iha Sekretaria Estadu Igualdade (SEI), Kaikoli, Kinta ne’e.
Notísia relevante : SEKOMS no TIC Timor, I.P fasilita formasaun SDII ba ajente mídia
Governante ne’e dehan, diretór sira sempre halo avaliasaun dezempeñu interna kada semana no bainhira iha disiplina no produtividade di’ak iha serbisu laran maka sei iha oportunidade bele kontinua serbisu hanesan kontratadu ba fulan-neen tan.
“Maibé se avaliasaun dezempeñu mak ladi’ak bele hapara sira-nia kontratu. Nune’e, funsionáriu kazuais sei kontinua asina kontratu foun hahú loron 01 Jullu no sei remata iha loron 31 Dezembru 2025,” Expedito esplika.
Biban ne’e, Sekretáriu Estadu no ekipa rona funsionáriu sira-nia preokupasaun durante tinan-ida serbisu.
“Molok sira atu asina fali kontratu foun mak sei halo avaliasaun dezempeñu tuir relatóriu ne’ebé kada diretór hato’o mai. Ne’e duni, ha’u husu ba sira atu tau-atensaun ba kondisaun tolu hanesan funsionáriu kazuais, tenke rai sira-nia segredu ba serbisu Estadu nian, onestidade no lealdade ba serbisu,” nia katak.
Governante ne’e reforsa, funsionáriu kazuál sira mós iha prontidaun hodi halo tuir kondisaun tolu iha área komunikasaun sosiál.
Maski iha funsionáriu kazuál na’in-sia maka rejigna-an husi serbisu, maibé Diresaun Nasionál Rekursu Umanu subtitui fali ona funsionáriu foun na’in-10 hodi koloka ba kada diresaun ne’ebé presiza, ho prosesu rekrutamentu interna.
Jornalista : Alexandra da Costa
Editora : Julia Chatarina
