DILI, 01 Jullu 2025 (TATOLI) – Deputadu opozisaun husi bankada FRETILIN, Antoninho Bianco, bolu atensaun Governu nian atu tau atensaun ba distribuisaun medikamentu iha instalasaun saúde sira.
Antonino Bianco hateten saúde nu’udar pilár prinsipál iha dezenvolvimentu nasaun. Tuir nia, bainhira sistema saúde nasaun ida la forte ou la funsiona ho di’ak, sei iha difikuldade atu alkansa objetivu dezenvolvimentu sira seluk.
Tanba ne’e, Governu liuhusi Ministériu Saúde iha responsabilidade boot atu garante servisu saúde ne’ebé justu, ekuitativu no kualidade.
“Maibé, realidade saida mak akontese, ai-moruk la disponivel hanesan pasiente sofre moras kankru haktuir ba midia katak nia fulan haat ona la konsumu ai-moruk, tanba medikamentu ba moras refere stockout. Iha HNGV, falta ai-moruk barak hanesan sutura ba inan isin-rua mós stockout no povu hakilar ba doutór no enfermeiru sira iha área rurál hanesan akontese iha aldeia Foholulik postu saúde Tilomar”, nia hato’o liuhusi reuniaun plenária Parlamentu Nasionál.
Nia mós preokupa kona-ba númeru mate iha ospitál sira kada loron. Tanba ne’e, Ministériu Saúde presiza fó atensaun atu hadi’a prestasaun servisu, atu garante asesu ba servisu saúde ho kualidade no promove efisiénsia, transparénsia no profisionalizmu iha jestaun husi rekursu no infraestrutura sira.
“Direitu fundamentál povu ne’ebé konsagra iha Konstituisaun, Estadu iha devér atu defende no promove direitu ema hotu nian ba saúde, asisténsia médika sanitária, no tenke harii servisu nasionál saúde universál ba ema hotu-hotu, tuir nia kbiit, gratuita ka la selu tuir lei haruka”, nia akresenta.
Vise-Ministru ba Asuntu Parlamentár, Adérito Hugo da Costa, hato’o apresiasaun ba krítika husi opozisaun hanesan parte ida atu motiva Governu hala’o serbisu di’ak liután ba iha setór saúde.
“Hanesan intervensaun bankada FRETILIN nian, liuliu ema mate iha HNGV, sei iha ema mate na’in-tolu ka haat loroloron, ne’e mehi ita hotu nian reforsa investimentu iha setór saúde”, nia hateten.
Tuir governante ne’e, iha ospitál sei falta médiku espesialista sira, nune’e Governu kompromete hodi aposta maka’as ba rekursu umanu atu haruka profisionál saúde kontinua hasai espesialista hodi bele prienxe iha instalasaun saúde, nune’e fó atendimentu di’ak iha setór saúde.
Aleinde ne’e, kontinua presta atensaun ba kontrusaun infraestrutura iha HNGV ne’ebé la’o hela, no haree falta ekipamentu sira. Ministériu Saúde presiza estabelese tan sentru saúde iha Ermera no ospitál referénsia iha Same ne’ebné nia dezeñu iha hotu ona no agora faze preparativu ba konkursu públiku.
Vise-ministru ne’e mós rejista preokupasaun kona-ba falta medikamentu iha unidade saúde balun hodi hato’o ba entidade tutela atu toma atensaun.
Notísia relevante: HNGV klarifika ba públiku kona-ba ai-moruk anestésia iha sala operasaun
Jornalista: Nelson de Sousa
Editora: Maria Auxiliadora
