DILI, 21 Jullu 2025 (TATOLI)–Governu liuhusi Ministériu Juventude, Desportu, Arte no Kultura (MJDAK) realiza Feira Kulturál Komunidade País Lian Portugés (CPLP, sigla portugés), iha Sentru Konvensaun Dili (CCD, sigla portugés), hahú loron 20 to’o 26 Jullu 2025.
Ministru Juventude, Desportu Arte no kultura, Nelyo Isaac Saramento hateten Feira Nasionál Kultural ne’e dedika ba públiku liuliu ba país membru sira.
“Sira hakarak haree ita-nia produsaun pekena empreza sira-ne’ebé prodús tais no prosesu homan,” Ministru Nelyo dehan ba TATOLI iha lokál traballu, Segunda ne’e.
Aleinde ne’e, nia hatutan, iha mós kulinária, karik sira (membru CPLP) hakarak koko hahán bele mai iha-ne’e ho folin ne’ebé la’ós karun.
“Ha’u bele dehan katak einjerál komesa husi loron dahuluk to’o agora buat hotu la’o di’ak,” nia haktuir.
Iha fatin hanesan, Jestora SEA MOS, Ivónia Lopez informa katak sira fa’an produtu ida-ne’ebé mai husi budu tasi. Produtu husi budu tasi ne’e kahur ho bani-been, ai-nanas ho haas, ida-ne’e mak hanaran produtu SEA MOS.
“Ami-nia produtu ne’e, ami prodús iha Timor no balun esporta ba rai-li’ur no balun fa’an iha Timor,” Ivónia dehan.
Notísia relevante : Simeira CPLP iha Guiné-Bisau diskute seguransa alimentár
Nia haktuir produtu sira-ne’e nia funsaun la hanesan, balun hatuun isin, vitamina ba ema ne’ebé vontade laiha atu han, iha mós body scrub.
Kona-ba presu, Ivónia esplika, sacet ida sentavu 50, iha mós presu $20 no falun boot ida $20.
“Ami prodús loron-loron. Produtu ne’e ami haruka ona bá munisípiu sira hanesan Baukau, Lautein, Bononaru no Manufahi,” nia tenik.
Enkuantu, nia dehan, matéria prima ba produsaun nian maihusi agrikultura no produtu ne’e hala’o teste ona iha laboratóriu internasionál sira, nune’e bainhira konsume la fó impaktu ka efeitu ba saúde.
“Ida-ne’e ita la tau ai-moruk, tanba ne’e di’ak tebes ba ita atu konsume,” nia hakotu.
Produtu ne’e esporta ona ba nasaun sira hanesan Austrália, Amérika, Inglaterra. Ezisténsia husi pekena empreza ne’e hahú husi tinan 2021.
Jornalista : Osória Marques
Editora : Julia Chatarina
