Konstrusaun ponte no estrada iha bee-tudak Fatisi atinje ona 80%
DILI, 28 Jullu 2025 (TATOLI)—Konstrusaun estrada no ponte iha bee-tudak (air terjung) ne’ebé lokaliza iha diresaun suku Fatisi, postu-administrativu Laulara, munisípiu Aileu atinje ona 80%, tanba daudaun ne’e kompañia Arkuiris hahú fui ona alkatraun ba faze dahuluk nian no hela faze daruak nian fui tan ne’e finaliza ona.
“Tamba dalaruma tempu udan-boot rezulta sai mota-boot iha ne’e, entaun komunidade tenke hein mota para to’o oras tolu ka oras haat mak foin sira bele hakur liu. Nune’e, fatin ne’e, ita presiza duni halo emerjénsia hodi fasilita munisípiu hirak ne’e bele halo movimentu iha tempu udan, nune’e ha’u aselera lalais hodi hudu kompañia sira servisu husi loron to’o kalan hodi finaliza lalais,” Ministru ne’e informa ba jornalista sira hafoin hala’o viajen husi Manufahi mai Dili no to’o iha fatin kontrusaun ne’e sei para hodi halo observasaun ba servisu kompañia nian ne’ebé fui hela alkatraun ba estrada, tanba iha fatin ida-ne’e tinan-tidan sempre sai impaktu boot ba komunidade bainhira halo viajen ba munisípiu Aileu, Ainaru, Manufahi no Kovalima, iha bee-tudak Fatisi, Aileu, domingu (27 Jullu 2025) horisehik.
Governante ne’e haktuir, dalaruma mós kaereta ambulánsia tula ema moras atu ba halo tratamentu saúde iha Dili, to’o tiha ona fatin ne’e sira labele liu, entaun fila-fali halo movimentu liuhusi Lahane nian, ne’eb´e maske dalan di’ak maibé kle’ur liu kuazé oras rua ka tolu.
“Fatin sira-ne’e mak sai obstákulu boot. La’ós iha ne’e de’it maibé iha mós mota Kasnafar nian, entaun komunidade sira laiha dalan atu fila, sira tenke hein de’it iha klaran bainhira udan no mota para ona foin sira bele liu,” nia esplika.
Tanba ne’e, ministru ne’e mós orienta empreza Arquiris atu harii tan toilet rua, ida ba feto no ida ba mane iha fatin ne’e, tanba bainhira ema halo viajen husi foho sempre deskansa iha fatin ne’e, entaun ita mós presiza fasilita haris-fatin ba sira hodi uza iha tempu emerjénsia ruma. Aleinde ne’e mós sei konstrui eskada no moru protesaun (pagar besi) iha bee-tudak tanba kauzé labarik-kiik sira mós halo vizita iha fatin ne’e.
Entretantu projetu ne’e konstrui husi kompañia Arquiris ho montante orsamentu rihun $7 no kontrusaun ne’e hahú iha inísiu Marsu ne’e.
Jornalista : Alexandra da Costa
Editór : Cancio Ximenes
