DILI, 30 Jullu 2025 (TATOLI)—Prezidente Repúblika, José Ramos Horta, kuarta ne’e, hasoru malu ho ANZ hodi diskute kona-ba kompromisu ANZ nian ba kreximentu ekonomia Timor-Leste nian, iha Palásiu Prezidensiál Nicolau Lobato, Bairru Pite, Dili. no prezidente Ramos Horta kontente ho aprejentasaun ANZ nian.
Diretór Nasionál Banku ANZ Timor-Leste, Martin Beattie, aprezenta ninia funsaun foun no reafirma ANZ nia kompromisu ba tempu naruk ho Timor-Leste, aprezenta ninia planu sira atu kontinua ninia prezensa ba pelumenus dékada ida tan.
“Diskusaun sira sentra iha ANZ nia kontribuisaun sira ba ekonomia Timor nian, ho foku partikulár ba nia programa literasia finanseira Money-Minded,” Diretór ne’e hateten ba jornalista sira hafoin enkontru ne’e ramata.
Beattie mós destaka banku nia foku iha atendementu ba kliente komersiál no korporativu sira hodi apoia kreximentu negósiu no investimentu iha nasaun.
Iha okaziaun ne’e, Prezidente Ramos Horta elojia inisiativa ida-ne’e, liuliu ninia apoiu ba traballadór timoroan sira-ne’ebé partisipa iha eskema mobilidade laborál Austrália nian, ne’ebé ekipa sira ho abilidade vitál kona-ba orsamentasaun no poupansa.
Prezidente Ramos Horta enkoraja ANZ atu sai nafatin parseiru prinsipál iha Timor-Leste nia dezenvolvimentu iha futuru no destaka projetu infraestrutura lubuk ida ne’ebé planeia ona ba nasaun ne’e no fó hanoin ba banku atu envolve ativu nafatin, tanba sira-nia servisu finanseiru no apoiu sei sai krusiál ba implementasaun susesu projetu nasionál sira-ne’e.
Jornalista : Hortencio Sanchez
Editór : Cancio Ximenes
