PM Xanana lansa fatuk dahuluk konstrusaun ponte Lamara Natarbora
MANATUTU, 02 Agostu 2025 (TATOLI)—Primeiru-Ministru, Kay Rala Xanana Gusmão, sábadu ne’e, lansa fatuk dahuluk ba konstrusaun ponte Lamara iha suku Umaboku, postu administrativu Barike Natarbora, munisípiu Manatutu.
Molok halo lansamentu fatuk dahuluk, Primeiru-Ministru ho nia komitiva simu ho tebedai husi lia-ni’an sira no tara tais, hafoin ne’e lia na’in sira hamulak tuir lisan no kultura Manatutu nian oho animál foti nia ran fase ba fatin konstrusaun ponte nian.
Primeiru-Ministru, Kay Rala Xanana Gusmão, husu komunidade Natarbora serbisu ho laran ho dedikasaun tomak ba rai ne’e tanba ninia benefísiu ne’e ba povu hodi fasilita movimentu komunidade nian.
“Ami husu mós ba kompañia Shandon Hejian, ami hotu hein, ponte ne’e halo kualidade ho tempu badak, ami hotu hein imi-nia esforsu,” Xanana Gusmão hateten iha ninia diskursu Natarbora, ohin.
Iha biban ne’e, Xanana husu povu Natarbora-oan tenke partsipa ho di’ak tanba Timor-Leste funu tinan 24 auguenta to’o ukun an. Hafoin ukun an, agora importante mak iha netik atensaun ba povu nia difikuldade, nune’e ohin mai halo lansamentu fatuk dahuluk no fiar katak kompañia bele halo serbisu bele la’o di’ak.
“Maibé povu Natarbora tenke partsipa iha ita-nia dezenvolvimentu iha kraik ne’e importante tebes. Buka aprende serbisu tanba Natarbora sei sai fonte boot ida ba reseita iha futuru tanba sei iha projetu Tasi-Mane,” nia dehan.
Serbisu iha terrenu, nia dehan, labele hein ema husi rai-li’ur de’it mak mai serbisu maibé imi mak tenke kontribui.
“Ha’u apela ba imi esforsu an kontribui ba nasaun ne’e, lae ita mak hein de’it husi ema li’ur hotu no ita sei tuur hare de’it,” nia dehan.
Iha fatin hanesan, komunidade Natarbora, Angela Hornai Pires, hateten nia parte sente kontente no hato’o agradesemntu ba Governu tanba hanoin povu ohin loron bele hakat ona ba sira-nia fatin halo lansamentu ba ponte Lamara.
Tuir nia, durante ponte laiha, ida-ne’e difikulta tebes ba sira-nia atividade loro-loron tanba mota difikulta tebes ba sira atu hakat mota.
“Ami fiar katak ho lansamentu fatuk dahuluk ohin ne’e, tarde ka sedu, ami iha ona ponte nune’e fasilita ami-nia atividade loro-loron nian,” nia hateten.
Konstrusaun pontu refere, ohin asina direta husi Ministru Obra Públika, Samuel Marçal no na’in ba kompañia internasionál Shandon Hejian Construction Group Xina, Ren Yong Jie ne’ebé akompaña direta husi Primeiru-Ministru, Kay Rala Xanana Gusmão.
Ponte refere, ohin, asina ona kontratu no iha fulan ne’e kompañia sei hahú mobilizasaun ba ekipamentu atu hahú serbisu, durasaun tempu loron 365 ka tinan ida, ho totál orsamentu $4.605.887,73 ho ponte nia naruk metru 100 no luan metro hitu (7).
Ponte Lamara rasik sei fasilita komunidade husi munisípiu tolu mak hanesan Manatutu, Manufahi inklui Vikeke.
Marka prezensa iha lansamentu fatuk dahuluk ba Ponte Lamara ne’e mak Sekretáriu Estadu Komunikasaun Sosiál, Expedito Dias Ximenes, Vise-Ministru Asuntu Parlamentár, Aderito Hugo da Costa no seluk tan.
Jornalista : Arminda Fonseca
Editór : Cancio Ximenes
