ADN monitoriza projetu ne’ebé empreza lokál-internasionál sira implementa iha territóriu
DILI, 04 Agostu 2025 (TATOLI)—Ministériu Planeamentu no Investimentu Estratéjiku (MPIE) liuhusi Agência Dezenvolvimentu Nasionál (ADN) kontinua halo monitorizasaun ba projetu sira-ne’ebé empreza lokál no internasionál sira implementa iha territóriu nasionál.
Diretór Interinu Agência Dezenvolvimentu Nasionál, Januário Maia Guterres, hateten ADN nia tékniku sira-ne’e kuazé destaka hotu iha territóriu nasionál hodi halo monitorizasaun ba projetu Governu nian ne’ebé kompañia sira implementa iha baze.
“Ami-nia enjiñeiru sira-ne’ebé destaka tuir ida-idak nia área, balun iha área estrada no balun fali iha edifísiu, tamba ekipa enjiñeiru sira-ne’ebé destaka iha munisípiu ne’e, sira kontinua halo monitorizasaun no halo inspesaun rutina ba projetu sira-ne’ebé la’o hela,”, Diretór Interinu ne’e informa ba Agência Tatoli iha nia kna’ar fatin, Fatuhada, ohin.
Dirijente interinu ne’e haktuir, foin lalais ne’e mós nia orienta ona tékniku sira katak inspesaun sira-ne’ebé ita halo labele hein pagamentu mak foin halo inspesaun. Maibé inspesaun rutina ne’e tékniku sira tenke kontinua halo monitorizasaun, nune’e to’o prosesu pagamentu ona karik ita iha ona dadus ba progresu nian ho loloos.
Atu nune’e, nia dehan, labele difikulta empreza sira-ne’ebé kestiona katak kuaze pagamentu ne’ebé tarde, entaun meiu ida-ne’e mak nia orienta ona ba tékniku sira kontinua halo inspesaun hodi fasilita prosesu pagamentu la’o ho lalais.
“Bazeia ba informasaun husi tékniku sira, ita seidauk halo identifikasaun ba empreza sira-ne’ebé komete irregularidade maibé dalabarak mak identifika projetu ne’e la’o tarde no balun seluk abandona projetu,” nia hatutan.
Enkuantu, nia esplika, kona-ba projetu abandonadu sira-ne’e kuaze ADN rekomenda ona ba ministériu sira-ne’ebé sai doadór projetu hodi halo notifikasaun.
Aleinde ne’e, projetu sira-ne’ebé la’o tarde tanba dalaruma empreza lokál sira ladun iha tékniku ne’ebé mak di’ak hodi falla ba jestaun projetu no fundu finanseira ne’ebé ladun sufisiente hodi kontinua halo jestaun ba projetu.
“Tanba ne’e mak ita bolu jestór projetu sira-ne’e atu haree didi’ak antes hakat ba faze implementasaun, entaun atu responde ba sira-nia finanseiru, prosesu pagamentu ne’ebé submete ona iha AND ita hahú aselera,” nia esplika.
Maske nune’e, kompañia sira tenke implementa projetu bazeia ba kontratu ne’ebé define, tenke implementa tuir dezenu no mós BoQ ne’ebé aprovadu husi verifikadór AND, karik empreza balun ne’ebé implementa latuir dezeñu mak sira sei haruka sobu no kontinua hadi’a fila-fali.
Jornalista : Alexandra da Costa
Editór : Cancio Ximenes
