Governu Timor-Leste aumenta kuota ba asesu servisu BIRD
DILI, 04 Agostu 2025 (TATOLI)—Ministra Finansa, Santina José Rodrigues F. Viegas Cardoso aprezenta Rerezolusaun ida no hetan ona aprovasaun iha reuniaun estraordinária Konsellu Ministru (KM), Segunda ne’e.
Rezolusaun ne’e kona-ba subskrisaun adisionál ba kuota sira-ne’ebé aloka ba Repúblika Demokrátika Timor-Leste, tuir Rezolusaun nú.663 no nú.664 husi Konsellu Administrasaun Banku Internasionál ba Rekonstrusaun no Dezenvolvimentu (BIRD) Grupu Banku Mundiál nian.
“Objetivu sira-ne’e bele hetan liuliu liuhusi finansiamentu, produtu sira jestaun risku nian no servisu finanseiru sira seluk, asesu ba péritu sira no korpu koñesimentu iha disiplina sira ne’ebé relasiona ho dezenvolvimentu, atu nune’e membru empréstimu sira bele halibur, jere no fó prioridade ba rekursu sira ne’ebé nia objetivu prinsipál maka relasiona ho dezenvolvimentu,” referidu nota husi ezekutivu ne’ebé Ajénsia TATOLI asesu hafoin reuniaun KM, iha Palásiu Governu.
Notísia relevante : Banku Mundiál-Governu diskute finansiamentu ba kobertura universál saúde iha TL
BIRD hanesan kooperativa dezenvolvimentu globál ida ne’ebé ninia objetivu mak atu ultrapasa pobreza no hadi’a padraun moris nian. BIRD serbisu hamutuk ho ninia membru emprestadór sira atu alkansa kresimentu ekonómiku ne’ebé ekuitável no sustentável iha sira-nia ekonomia nasionál no atu hetan solusaun efetivu ba problema rejionál no globál sira ne’ebé urjente iha dezenvolvimentu ekonómiku no sustentabilidade ambientál.
Haree ba anúnsiu Grupu Banku Mundiál kona-ba subskrisaun sira ba kapitál BIRD 2018 nian, ne’ebé nia loron ikus maka loron 01 Outubru 2025, Repúblika Demokrátika Timor-Leste opta ona hodi subskreve ba buat sira tuirmai :
- Asaun adisionál 76 husi asaun kapitál BIRD ne’ebé maka aloka tuir Rezolusaun nú. 663 Konsellu Administrasaun nian, ho títulu ‘2018 General Capital Increase;
- Asaun adisionál 89 husi asaun kapitál BIRD nian ne’ebé maka aloka tuir Rezolusaun nú. 664 Konsellu Administrasaun nian, ho títulu ‘2018 Selective Capital Increase.’
Jornalista : Alexandra da Costa
Editora : Julia Chatarina
