Sistema foun seguransa sosiál permite empregadór akompaña kontribuisaun via online
DILI, 05 Agostu 2025 (TATOLI)—Governu liuhusi Ministériu Solidariedade Sosiál no Inkluzaun (MSSI) no Institutu Nasionál Seguransa Sosiál (INSS), Tersa ne’e, lansa ona sistema online ba módulu kontribuisaun seguransa sosiál https://segurancasocial.gov.tl/index.
Ministra Solidariedade Sosiál no Inkluzaun, Verónica das Dores, hateten, lansamentu ne’e ho objetivu atu fasilita empregadór no funsionáriu sira bele akompaña kontribuisaun ba seguransa sosiál durante serbisu.
“To’o aplikasaun ne’e lansa, loron-loron susar tebes atu ema hamriik iha liña no ema ida ka rua de’it maka halo serbisu, nune’e lori tempu naruk. Tanba ne’e,iha mundu dijitál ohin loron, ami prefere kria sistema ida hodi ajuda empregadór sira bele akompaña sira-nia fundu sira,” Ministra informa ba jornalista sira, iha salaun Oka, Hudi-laran.
Notísia relevante : INSS lansa mobile APP
Iha sorin seluk, Prezidente INSS, Arlindo Pinto, esplika, aplikasaun ne’e dijitaliza prestasaun servisu ba públiku ho objetivu lima hanesan :
- Fasilita submisaun informasaun diretamente husi empregadór sira bazeia ba rekursu umanu,
- Fasilita empregadór nia emisaun ba sira-nia boletin pagamentu rasik,
- Fasilita empregadór sira-nia submisaun ba dokumentu rasik.
- Fasilita operasaun no fornesimentu informasaun ba entidade,
- Fasilita rejistu funsionáriu husi entidade sira.
“Tanba ne’e, ohin ami kontinua lansa módulu kontribuisaun seguransa sosiál husi sistema online, ne’ebé ami oferese ba ami-nia empregadór sira, liuliu iha setór públiku no privadu, ne’ebé kontribui ona ba regularizasaun funsionáriu sira-nian,” nia katak.
Aleinde ne’e, ekipa téknika sira daudaun ne’e dezenvolve ona sistema finanseiru internu ba seguransa sosiál no planu atu integra iha sistema free balance.
“Tanba ita-nia lei seguransa sosiál mós hateten katak ita iha setór finanseiru rasik no ita-nia sistema rasik mak atu regulariza ita-nia sistema finanseiru seguransa sosiál,” Prezidente INSS reforsa.
Liuhusi sistema módulu kontribuisaun nian bele fó tulun ba servisu públiku sira atu submete dokumentu sira husi empregadór, atu nune’e la presiza ba diretamente iha INSS maibé liuhusi sistema online.
To’o novembru 2024, iha instituisaun Estadu hamutuk 81 no 21 mak inskreve-an iha INSS iha fundu rezerva sosiál liuhusi MSSI.
Tuir dadus husi INSS iha tinan 2024 nia rohan, traballadór setór públiku ne’ebé rejista iha sistema seguransa sosiál iha 73.000 no empregadór iha 84.000.
INSS mós relata dadus traballadór setór públiku hamutuk 2.300-resin mak asesu ona rejime pensaun seguransa sosiál ho totál kapitalizasaun ba fundu rezerva seguransa sosiál iha 2024 nian hamutuk millaun $250.
Iha projesaun ba tinan 2025, iha totál fundu rezerva seguransa sosiál hamutuk millaun $300.
Jornalista : Osória Marques
Editora : Julia Chatarina
