DILI, 09 Agostu 2025 (TATOLI)–Kongresu anuál estraordináriu ne’ebé hala’o iha Otél Palm Springs Fatuhada Dili, Sábadu ne’e, aprova relatóriu finanseiru no programa ho atividade ne’ebé hala’o iha tinan 2024.
Relatóriu finanseiru 2024 ho programa sira hetan aprovasaun ho votu unaminidade (votu 21), kontra zero no abstensaun zero husi kongresista sira husi Asosiasaun Futeból hamutuk 21.
Prezidente Federasaun Futeból Timor-Leste, Nilton Telmo Gusmão dos Santos hateten kongresu ne’e realiza bazeia ba estatutu FFTL nian nune’e parte hotu bele haree hamutuk relatóriu no rezultadu servisu sira-ne’ebé liu ona iha tinan kotuk.
“Ita agradese ba Maromak ho partisipasaun ativu husi membru asosiasaun sira hotu. Sira fó ona sira-nia votu afavór hodi aprova ita-nia relatóriu finanseiru no atividade tinan kotuk nian. Ida-ne’e hatudu mai ita katak asosiasaun sira iha ona sinerjia ida di’ak entre asosiasaun ho Federasaun Futeból Timor-Leste atu hamutuk haree ba dezenvolvimentu futeból ida dook liu iha oin-mai,” Nilton informa ba jornalista sira hafoin termina kongresu estraordináriu referidu.
Nia dehan, ho laran di’ak asosiasaun membru sira-nian hamutuk iha fileira ida hodi tau hanoin ida transforma futeból sai orgullu nasionál.
Tuir dadus ne’ebé TATOLI asesu husi FFTL katak relatóriu finanseiru tinan 2024 nian, orsamentu ne’ebé hetan apoiu husi Federation International Football Assosiation (FIFA) hamutuk $1.250.000, gasta ba operasionál hamutuk $850.000, travel hamutuk $250.000, TDS hamutuk $100.000.
Notísia relevante: FFTL realiza kongresu estraordináriu ba dala-12
Orsamentu ne’ebé apoiu husi Asian Football Confederation (AFC) hamutuk $406.469. Husi totál ne’e gasta ba Enhance operational hamutuk $248.220, gasta ba Ehance advantage hamutuk $118.809, gasta ba Ehance extra time hamutuk $39.469.
Domestic Competition -2024
FFTL Cup 2024 gasta osan hamutuk $86.028,41. Gasta ba futeból juveníl U-15 FIFA TDS program gasta $54.614. Iha momentu ne’e, hetan mós apoiu orsamentu husi Governu liu Ministériu Juventude Desportu Arte no Kultura (MJDAK) ba kopa juveníl U-15 hamutuk $60.000.
Enkuantu, iha kopa futeból U-18 hetan apoiu husi AFC Enhance Pass ho orsamentu hamutuk $74.990. Kopa ba U-18 hetan mós apoiu husi FIFA ho orsamentu hamutuk $34.100.
Iha atividade ba selesaun nasionál sénior mane no feto iha tinan 2024 kualifikasaun ba jogu AFC hala’o iha Bali-Indonézia bainhira Timor-Leste kontra Mongolia gasta osan hamutuk $36.781,68, gasta ba operasaun hamutuk $31.350. Eventu ba ASEAN Mitsubishi Eletric Cup 2024 ne’ebé organiza husi ASEAN Football Federation (AFF) gasta orsamentu hamutuk $84.000. ASEAN Women’s Cup ne’ebé hala’o iha Laos selesaun Timor-Leste ba kompete gasta osan hamutuk $16.000.00.
Iha parte seluk, kona-ba selesaun nasionál Youth Men nian Timor-Leste reprezenta selesaun U-16 gasta osan hamutuk $33.055. Husi orsamentu ne’e hetan mós apoiu balun husi MJDAK hamutuk $24.930 no FIFA apoiu $8.125. Iha parte U-19 nian hala’o jogu FIFA Friendly Match gasta osan hamutuk $34.812. Husi orsamentu ne’e apoiu mós husi MJDAK hamutuk 24.930 no husi FIFA hamutuk $ 9.882.
Kona-ba kualifikasaun AFC ba U-20 gasta orsamentu FIFA nian hamutuk $27.650.00.
Orsamentu ne’ebé gasta ba atividade sira hanesan formasaun ba arbitrajen sira gasta orsamentu hamutuk $49.000.00, hala’o atividade formasaun ba árbitru sira futeból bazíku futsál nian iha munisípiu sira hanesan Baukau, Likisá, Manatutu, formasaun ba abitrajen sira iha Dili, nune’e mós ba FIFA refrece course ba ema na’in-32 hahú 15-21 fulan-Abríl 2024.
Kona-ba kongresu ordináriu ne’ebé hala’o iha loron 09 fulan-Janeiru 2024 hetan apoiu orsamentu husi AFC hamutuk $14.000, kongresu estraordináriu iha loron 24 fulan-Outubru 2024 gasta osan hamutuk $27.766.
Jornalista: Hortencio Sanchez
Editór: Xisto Freitas da Piedade
