DILI, 09 Agostu 2025 (TATOLI)–Prezidente Federasaun Futeból Timor-Leste (FFTL), Nilton Telmo Gusmão dos Santos deklara katak kongresu atu hili estrutura foun FFTL períodu 2026-2030 sei hala’o iha fulan-Fevereiru 2026.
“Iha oportunidade ida-ne’e, ha’u deklara katak prósimu kongresu eletivu ne’ebé atu ita bele hili fali estrutura foun ba ita-nia Federasaun Futeból iha fulan-Fevereiru. Loron sei fó-sai iha tempu tuirmai,” Nilton hateten iha nia diskursu ikus bainhira taka kongresu anuál estraordináriu ba dala-12, iha Otél Palm Springs Fatuhada, Dili, Sábadu ne’e.
Nia dehan kongresu ne’ebé hala’o, timoroan hotu ne’ebé hadomi futeból bele prepara-aan hodi kompete nune’e bele dezenvolve di’ak liután futeból iha nasaun ida-ne’e.
“Ha’u deklara kona-ba kongresu tinan oin nian, maibé ha’u atu deklara tan katak atividade boot ida FFTL sei hala’o iha tinan ikus ida-ne’e. Ita hakakarak hala’o festivál ida-ne’ebé envolve Asosiasaun Munisipál sira hotu lori labarik sira mai iha Dili joga durante loron lima (5) mak fila hikas bá munisípiu,” nia tenik.
Aleinde ne’e, nia hatutan, iha mós atividade ba klube sira-ne’ebé hamahan-aan iha Liga Futeból Timor-Leste (LFTL), FFTL sei realiza tasa federasaun nian sei tau hamutuk klasifikasaun primeiru-kuartu husi Primeira Divizaun hodi joga hamutuk ho primeira no segunda klasifikasaun husi Segunda Divizaun nian.
“Ba klube sira, ida-ne’e atu fó biban ba ita-nia klube sira hodi bele kapitaliza sira-nia aan iha atividade ne’ebé organiza husi FFTL. Ha’u garante katak atividade sira-ne’e bele insentiva hikas ita-nia klube sira atu bele hetan fali sira-nia forsa finanseira, tanba iha mídia sosiál ema hahú ko’alia ona kona-ba ida-ne’e. Tanba ne’e mak ita buka atu organiza atividade sira-ne’e hodibele hetan baze klube sira-nian, ba mós sira-nia adeptu sira. Ida-ne’e mak ita buka atu hala’o iha tinan ikus ida-ne’e,” Nilton katak.
Entretantu, Prezidente Klube Kampiaun Primeira Divizaun LFTL, José Luís de Oliveira hateten Karketu FC mantein iha nia pozisaun hodi fó nafatin apoiu másimu ba Nilton Gusmão atu avansa iha kongresu tinan oin tanba nia ema ida-ne’ebé iha duni paixaun ba futeból, nia lideransa konsege rezolve problema barak iha FFTL.
Nia haktuir katak durante ne’e dívida barak iha FFTL maibé Nilton uza meiu seluk rezolve ona.
Iha sorin seluk, Prezidente Asosiasaun Futeból Munisípiu Baukau, Marito da Costa Belo hateten sira sei apoiu figura ne’ebé haree di’ak hodi lidera FFTL bá-oin.
“Konserteja ita sei haree, maibé ita tenke apoiu ema ne’ebé di’ak mak bá lidera. Prezidente ida agora ita rasik haree ho matan, nia halo buat di’ak barak, iha-ne’ebé la’ós halo iha nasionál de’it maibé bele to’o iha munisípiu sira hotu. Ida-ne’e mak nia orgullu,” Marito afirma.
Nune’e mós, Sekretáriu Jerál Asosiasaun Futeból Munisípiu Ermera, Zelasio Monteiro Carvalho Babo informa katak iha kongresu mai ne’e asosiasaun hotu sei hili lideransa ne’ebé di’ak hodi lidera FFTL.
“Ita sei haree figura ne’ebé lidera di’ak, ita sei hili mak ida-ne’e,” nia hakotu.
Jornalista: Hortencio Sanchez
Editór: Xisto Freitas da Piedade
