Nilton: “Futeból TL tenke iha abut ida forte”
DILI, 09 Agostu 2025 (TATOLI)–Prezidente Federasaun Futeból Timor-Leste (FFTL), Nilton Telmo Gusmão dos Santos alerta ba públiku no amante futeból sira hotu katak futeból iha Timor-Leste (TL) tenke iha abut ida forte ho plataforma ne’ebé di’ak atu fó oportunidade ba juventude timoroan hotu dezenvolve sira-nia talentu.
“Bainhira iha abut ida forte ho plataforma ne’ebé di’ak ne’ebé aleinde fó oportunidade ba joven timoroan sira dezenvolve sira-nia talentu, bele-muda mós sira-nia moris nu’udár profisaun profisionál ida-ne’ebé dignu,” Nilton hateten iha Otél Palm Springs Fatuhada, Dili, Sábadu ne’e.
Nia mós alerta ba asosiasaun profisionál sira katak tenke iha hanoin ida de’it atu transforma realidade no mehi sira-ne’ebé durante ne’e parte hotu luta atu dezenvolve futeból iha nasaun ne’e.
“Ita labele la’o mesak. Ita presiza tulun governante sira-ne’ebé Governa hela ita-nia rai ne’e. Se governante sira kontinua nafatin ho sira-nia karater egoizmu mak sei halo susar ita-nia jerasaun sira tuirmai,” nia afirma ho lian maka’as.
Nia haktuir katak ho egoizmu durante ne’e sakrifika ona jerasaun futebolista di’ak lubuk ida iha ezisténsia FFTL, tanba joven barak ne’ebé iha talentu labele avansa bá-oin.
Haree ba situasaun ohin loron Timor-Leste iha, jogadór talentozu balun hanesan João Pedro, Paulo Gally Freitas no seluk tan ne’ebé joga hela iha klube sira internasionál, Prezidente Nilton hakarak dezenvolve liutan jogadór hirak-ne’e no nia fiar bá-oin sei aumenta tan jogadór di’ak hodi ba joga iha klube sira iha diáspora.
“Ohin ita iha ona jogadór di’ak lubuk ida ne’ebé joga ona iha klube sira rai-li’ur. Ezemplu hanesan Gally, João Pedro ho sira seluk tan, más ita labele to’o de’it iha rua (2), neen (6) no sanulu (10), maibé se bele ita esporta jogadór barak liutan ba rai-li’ur,” nia subliña.
Jornalista: Hortencio Sanchez
Editór: Xisto Freitas da Piedade
