TATOLI, I.P propoin adisionál $400.294 iha OJE 2026
DILI, 13 Agostu 2025 (TATOLI)-Prezidente Konsellu Diretivu TATOLI-Ajénsia Notisioza Timor-Leste, Institutu Públiku, Noémio Mateus Soares Falcão, hatete propoin adisionál ho valór $400.294 hodi reforsa nesesidade institusionál.
“TATOLI deside husu tán adisionál $400.294 iha OJE 2026 ne’e atu reforsa nesesidade instituisaun nian, liuliu rekrutamentu ba jornalista sira iha tinan oin, ba munisípiu hirak ne’ebé TATOLI seidauk iha, nune’e mós rekrutamentu ba jornalista sira hodi haforsa ekipa iha nasionál”, dehan Noémio ba jornalista TATOLI hafoin aprezenta orsamentu adisionál iha Komité Revizaun Orsamentu ne’ebé halo iha Ministériu Finansa, kuarta-ne’e.
Noémio Falcão hatete inisiál ne’ebé TATOLI simu la sufisiente atu finansia nesesidade TATOLI nian ba tinan oin. Tanba ne’e, husi adisionál aumenta mós ba kapitál menór $100.00-resin hodi reforsa liután nesesidade instituisaun nian.
“Ita-nia orsamentu ne’e, ohin hetan reasaun pozitivu tebes husi membru Komité Revizaun Orsamentu sira, Prezidente KRO rasik ita-nia Nai Primeiru-Ministru hodi hato’o mensajen pozitivu tebes ba TATOLI oinsá mak iha 2026 bele hatudu progresu”, katak nia.
Tetu orsamentu ne’ebé TATOLI, I. P simu mak $573,322 fahe ba kategoria saláriu no vensimentu $472,900 no bens servisu $100, 422.
Proposta adisionál totál $400,294 fahe ba saláriu no vensimentu $151,814, bens servisu $70.000, kapitál menór $178,480.
Notísia relevante: Orsamentu Agência TATOLI, I.P aprovadu iha espesialidade ho votu afavór 42
Jornalista : Natalino Costa
Editora : Rita Almeida
