DILI, 20 novembru 2024 (TATOLI)—Parlamentu Nasionál (PN) aprova proposta Orsamentu Jerál Estadu (OJE) 2025 hamutuk $667.055 ba TATOLI-Ajénsia Noticiosa Timor-Leste Institutu Públiku (TATOLI, I.P) iha faze espesialidade ho votu afavór 42, kontra tolu (3) no abstensaun 18.
“Hodi nune’e, orsamentu Agência Noticiosa pasa,” Prezidente Parlamentu Nasionál, Maria Fernanda Lay, fó sai iha debate proposta OJE 2025 faze espesialidade iha sala plenária PN, kuarta ne’e.
Orsamentu $667.055 ne’e aloka ba saláriu vensimentu $533.159, bens no serbisu $133.896.
Husi orsamentu ne’e hodi finansia programa garante liberdade espresaun no asesu informasaun ho nia sub-programa garante asesu informasaun ho ninia atividade haat (4) mak hanesan reforsa funsionamentu instituisaun, reforsa serbisu redasaun expande konteúdu no asegura kualidade, reforsa serbisu multimedia.
Programa funsionamentu no dezenvolvimentu instituisionál ho sub-programa funsionamentu instituisionál ho atividade ida (1) mak inspesaun, fiskalizasaun no auditória, sub-programa dezenvolvimentu instituisionál ho nia atividade tolu hanesan jestaun finanseira, administrasaun no lojístika, jestaun rekursu umanu no aprovizionamentu no jestaun kontratu.
Jornalista : Nelson de Sousa
Editór : Cancio Ximenes
