Ministru José Honório fó hanoin dosente nível lisensiatura labele hanorin iha IES
DILI, 18 Agostu 2025 (TATOLI)–Ministru Ensinu Superiór, Siénsia no Kultura, José Honório da Costa Pereira Jerónimo fó hanoin atu dosente ho nível edukasaun lisensiatura labele hanorin iha Institutu Ensinu Superiór (IES).
Ministru José Honorio dehan, bainhira aposta ba kualidade tenke dosente ho nível mestradu no doutoramentu mak hanorin iha IES.
“Karik iha universidade balun iha, ha’u apela nafatin ba sira katak to’o ona tempu ita hakarak hadi’a ita-nia kualidade ensinu iha ita-nia rai. Tanba ne’e, favór ida lisensiatura labele hanorin lisensiatura,” Ministru José Honório hato’o ba jornalista sira, iha INCT Matadoru, Segunda ne’e.
Notísia relevante : MESSK serbisu hamutuk Rede ASEAN hodi hasa’e kualidade edukasaun
Ministru haktuir, bazeia ba monitorizaun ne’ebé sira halo seidauk hetan lisensitura hanorin lisensitura, maibé lisensiatura sira bele hanorin diploma sira.
“Se lisensitura ida ba hanorin lisensiatura seluk, ne’e dala-ida tan ha’u husu ita-nia universidade no instititu sira atu kompre regra sira atu ita bele aposta ba kualidade, tanba la’o ohin ita ko’alia kualidade ohin kedan lae, maibé neneik sei to’o ba iha ne’ebá,” Ministru dehan.
Reitór Institutu Siénsia Saúde (ICS), Leão Borges, hateten, Institutu ne’e iha nafatin dosente ho nível edukasaun lisensiatura hodi hanorin kursu iha nível baxarelatu.
“Maibé iha fulan hirak liubá hetan ona aprovasaun husi parte relevante nune’e agora lisensiatura ona. Ita sei prepara tuir dosente ne’ebé ho nível lisensiatura ona,” nia katak.
Jornalista : Osória Marques
Editora : Julia Chatarina
