SEFOPE-Dili Development haruka joven na’in-ualu tuir formasaun iha Indonézia
DILI, 18 Agostu (TATOLI)-Sekretária Estadu Formasaun Profisionál no Empregu (SEFOPE) servisu hamutuk ho kompañia Dili Developmente, Lda, fó oportunidade ba benefisiáriu joven na’in-ualu (8) hodi ba tuir formasaun profisionál iha Jogjakarta-Indonézia.
Sekretáriu Estadu Formasaun Profisionál no Empregu (SEFOPE), Rogério de Araújo Mendonça, hateten benefisiáriu sira sei tuir formasaun iha Jogjakarta-Indonézia durante fulan tolu (3) iha área eletrisidade, ospitalidade, karpintária, manutensaun ba forklip no manutensaun ba lift.
“Hanesan ita hotu hatene, iha fulan tolu ba kotuk Sekretária Estadu Formasaun Profisionál no Empregu loke oportunidade ba joven sira liuhusi formasaun estájiu profisionál iha rai-li’ur no mós iha rai-laran,” Sekretáriu Estadu ne’e informa ba jornalista sira iha salaun VIP SEFOPE, Kaikoli, ohin.
Ida-ne’e, nia dehan, servisu hamutuk entre SEFOPE ho kompañia Dili Development, Lda, hodi halo rekrutamentu ba kandidatu joven foinsa’ sira-ne’ebé hakarak servisu iha sira-nia kompañia, entaun joven sira la’ós de’it ba servisu direta maibé sira mós sei hola parte formasaun durante fulan tolu iha Jogjakarta-Indonézia.
“Bainhira benefisiériu sira-ne’e fila-fali mai, kontinua servisu iha kompañia Dili Development ne’e rasik,” nia esplika.
Totál kandidatu selesionadu ba formasaun estájiu profisionál iha rai-li’ur hamutuk na’in-ualu (8), kompostu husi feto na’in-rua (2) no mane nain-neen (6), husi kandidatu ne’ebé mak submete dokumentu hamutuk 200-resin.
Benefisiáriu ba formasaun ne’e, Zefri de Jesus Cardoso Dates, hateten oportunidade ida-ne’e nia hetan informasaun husi SEFOPE no kompañia Dili Development, Lda, (Timor-Plaza) ne’ebé loke konkursu formasaun profisionál ba estájiu iha rai-li’ur.
“Entaun ha’u koko atu kandidatu ha’u-nia an ba oportunidade ida-ne’e no rezultadu ha’u selesionadu iha área manajament officer, nune’e ha’u sei koko esforsu hodi partisipa ho másimu durante formasaun profisionál ida-ne’e,” nia dehan.
Tamba, nia dehan, nia sei sai eransa katak sei esforsu aprende ho di’ak hodi hetan esperiénsia foun ne’ebé bele aumenta ninia kapasidade, nune’e bainhira nia fila-fali mai bele mellora ba ema seluk ne’ebé presiza.
Entretantu, benefisiária Lurdes da Costa sente kontente tanba bele selesionada iha área manutensaun ba lift nian.
“Ha’u kontente tanba bele liu kedas iha ha’u-nia área estudu nian, entaun oportunidade ne’e bele aumenta liután ha’u-nia koñesementu iha área referida,” nia dehan.
Nia hateten, saida mak nia aprende bele fó benefísiu ba nia-an no mós bele partilla ba ema seluk ne’ebé hakarak aprende iha área manutensaun ba lift nian, tanba la’ós mane de’it mak bele hatene iha área ida-ne’e maibé ita feto mós bele.
Jornalista : Alexandra da Costa
Editór : Cancio Ximenes
