BOBONARU, 27 Agostu 2025 (TATOLI)—Autoridade Inspesaun Atividade Ekonómika, Sanitária no Alimentár, Institutu Públiku (AIFAESA, I.P.), Kuarta ne’e, taka provizoriamente atividade loja Yangfa iha Maliana, Munisípiu Bobonaru durante loron 30.
Diretór Departamentu Planu Operasionál Rejistu Ai-han ba Labaratóriu AIFAESA, Angelo Edmundo Belo informa AIFAESA taka loja Yangfa tanba la ijiene hahú husi fa’an fatin to’o armajen pakotamentu ai-han.
Nia haktuir katak antes ne’e ekipa AIFAESA sensibiliza informasaun hodi fó-hanoin beibeik ba loja na’in atu hamoos maibé la kumpri.
Notísia relevante: AIFAESA koordena autoridade no operadór ekonómiku atu destaka funsionáriu iha Oekusi
“Ita presiza halo selajen para sira hadi’a. Ita fó tempu loron 30 para sira hadi’a sira-nia kondisaun. Se hotu ona sira bele hato’o pedidu mai AIFAESA depoiz mak ami-nia Inspetora Jerál foti desizaun halo re-inspesaun atu haree sira prenxe ona rekizitu ka rekomendasaun sira-ne’ebé ami fó ne’e ka lae. Bainhira la kumpri ami nafatin halo suspensaun to’o prenxe tiha buat sira-ne’e mak ita reativa,” nia informa ba jornalista sira iha Salaun Maria-Tapó, Bobonaru, Kinta ne’e.
Edmundo esplika AIFAESA halo selajen ba loja infratór sira ho intensaun atu operadór ekonómiku sira halo atividade tuir lei no rugulamentu ne’ebe iha kona-ba ai-han, indústria no restorante.
Iha biban hanesan, Koordenadór Autoridade Munisípiu Bobonaru, Celestino Marques husu loja na’in sira atu kumpri lei no rugalementu ne’ebé eziste.
“Negósiu livre. Estadu garante sidadaun hotu-hotu atubele halo atividade iha Timor, maibé tenke la’o tuir lei. Labele halo tuir idak-idak nia hakarak,” nia esplika.
Prezensa AIFAESA nian durante semana iha Munisípiu Bobonaru konsege halo inspesaun ba estabelesimentu 31. Husi númeru ne’e, identifikadu estabelesimentu rua mak komete infrasaun kompostu husi estabelesimentu ida produtu estragadu no ida seluk la ijiene.
Estabelese ramu AIFAESA iha Bobonaru
Entretantu, Koordenadór Autoridade Munisípiu Bobonaru, Celestino Marques hateten presiza estabelese ramu AIFAESA iha Munisípiu Bobonaru nune’e loron-loron bele halo inspesaun ba atividade ekonómiku no sanitária.
Celestino Marques hato’o asuntu ne’e iha nia intervensaun ba atividade divulgasaun kna’ar no kompeténsia AIFAESA, lei ho regulamentu atividade komersiál ho tema: “Hasa’e operadór ekonómiku nia koñesimentu hodi hala’o atividade komersiál tuir regulamentu”.
“Se bele ita-boot sira estabelese ramu iha Munisípiu Bobonaru, nune’e bele koordena didi’ak ho autoridade hodi hare tranzasaun hotu-hotu para hadook komunidade husi risku,” nia hateten iha Salaun Autoridade Munisípiu Bobonaru, Kinta ne’e.
Aleinde ne’e, Reprezentante Komandante Polísia Munisípiu Bobonaru, Inspetór Xefe José Lelo Bere hateten autoridade seguransa prontu apoia AIFAESA bainhira estabelese ramu iha Munisípiu Bobonaru.
Tuir Inspetór Xefe Polísia ne’e katak presiza duni estabelese ramu iha Munisípiu Bobonaru tanba durante ne’e PNTL servisu hamutuk ho AIFAESA identifika operadór ekonómiku barak halo atividade la tuir lei no regulamentu.
“Ita-nia Bobonaru maioria loke loja no kioske barak la halimar. Ita hotu hanesan konsumidór, dalaruma loja na’in sira ne’e nakar uitoan, tanba ai-fuan balun dodok tiha ona mós sira fa’an nafatin. Tuir loloos, sasán ne’ebé ladi’ak sira labele fa’an ona,” nia haktuir.
Entretantu, Sub-Inspetora AIFAESA, Quitéria da Costa hateten kestaun ne’e tama ona iha planu.
“Ami halo ona destakamentu iha RAEOA. Ba futuru ami sei haree atu destaka ami-nia funsionáriu mai iha Munisípiu Bobonaru hodi sira bele diretamente ho operadór ekonómiku sira hodi fahe informasaun,” nia tenik.
AIFAESA, I.P. estabelesidu iha loron-29 Jullu 2016 bazeia ba Dekretu-lei númeru: 36/2016 ne’ebé hetan primeira alterasaun ho Dekretu-lei númeru: 19/2024 ho kna’ar inspesaun no fiskalizasaun.
Jornalista: Sergio da Cruz
Editór: Xisto Freitas da Piedade
