DILI, 01 Setembru 2025 (TATOLI) – Federasaun Futeból Timor-Leste (FFTL) kontinua halo preparasaun liuhosi reuniaun tékniku molok realiza Kopa Juvenil sub-17 iha nível rejionál.
Diretór Kompetisaun Eventu FFTL, João Campos iha enkontru entre reprezentante Assosiasaun husi kada munisípiu husu bainhira realiza kompetisaun iha nível rejionál atu halo preparasaun másimu nune’e organizadu di’ak liután, liuliu ekipa sira-ne’ebé kompete iha rejionál no evita mosu manipulasaun ba jogadór hanesan dokumentu identidade.
“Kopa Juvenil 2025 ne’e ho objetivu atu promove foinsa’e sira-nia talentu hodi garante fini jogadór ba reforsa ekipa Selesaun Nasional Timor-Leste iha futuru,” hakerek nota imprensa ne’ebé Tatoli asesu, segunda ne’e.
Diretór Dezenvolvimentu Assosiasaun Membru FFTL, Iduk Vicente, agradese ba Asosiasaun sira tanba liuhosi vontade hirak-ne’e bele dezenvolve futeból di’ak liután iha futuru, liuliu bele hasa’e ekipa kualidade iha selesaun nasionál.
Kompetisaun nível munisipál ne’ebé realiza iha kada munisípiu hamutuk Asosiasaun 13 kompostu husi Asosiasaun Futeból Dili Leste, Likisá, Ermera, Aileu, Bobonaru, Ainaru, Manufahi, Kovalima, Oekuse, Manatutu, Baukau, Lautem no Vikeke no tuir planu sei hahú kompetisaun iha fulan-ne’e antes kontinua iha nível nasionál.
Entretantu, tótal ekipa ne’ebé selesionadu husi kompetisaun nível munisipál atu kompete iha nível rejionál hamutuk 26, kompostu husi mane 13 no Feto 13 ne’ebé fahe rejionál haat hanesan; Dili Leste ho Bobonaru sei joga iha estádiu Malibaca Yamato, Maliana.
Likisá, Ermera no Oekuse sei joga iha Estádiu Glenu.
Aileu, Ainaru, Manufahi no Kovalima sei kompete iha estádiu Manufahi, enkuantu Manatuto, Baukau, Vikeke no Lautem sei kompete iha estádiu Tadeu Laikana, Baucau.
Jornalista : Natalino Belo
Editór : Evaristo Soares Martins
