DILI, 03 Setembru 2025 (TATOLI)—Ministériu Solidariedade Sosiál no Inkluzaun (MSSI) rejista benefisiáriu foun hamutuk 20.000-resin ba programa Bolsa da Mãe Kondisionál iha territóriu tomak.
“Tuir dadus kona-ba tutór hanesan inan-aman ne’ebé tau-matan ba labarik sira hamutuk 19.696, maibé kuandu ita kalkula benefisiáriu hamutuk rihun 20-resin. Tanba dalaruma uma-kain ida iha labarik na’in-rua to’o tolu,” Diretór Jerál MSSI, Florencio Pina Dias Gonzaga, informa ba Jornalista Ajénsia TATOLI iha nia knaar fatin, MSSI, Kaikoli, Kuarta ne’e.
MSSI fó orientasaun katak hahú halo ezersísiu ba rejistu foun benefisiáriu tanba balansu iha, tanba ne’e presiza halo re-verifikasaun ba dukumentu balun ne’ebé seidauk kompletu.
“Faze daruak ita tenke halo rejistu foun, agora atu rejistu foun ba faze daruak no ita identifika ona hamutuk 19.696 hanesan ema ne’ebé tau-matan ba labarik sira, hanesan inan-aman ho ema ne’ebé tau-matan ba labarik sira. Ha’u aprezenta tutór ba faze daruak no ita seidauk halo klasifikasaun kle’an tanba dadus mai hela. Agora kada munisípiu sei update nafatin no sei haree kle’an iha faze tuir mai bainhira halo pagamentu faze daruak hodi hatene totál labarik no defisiénsia tuir grau eskola ne’e,” nia esplika.
Notísia relevante : MSSI halo ona pagamentu ba benefisiáriu 68.896 Bolsa da Mãe Kondisionál
Diretór dehan, nune’e hatene tuir kuantidade labarik sira iha eskola primária, pre-sekundária no sekundária maka hafoin halo pagamentu ba benefisiáriu sira iha Outubru. MSSI halo pagamentu ba benefisiáriu foun iha inísiu Outubru ou Outubru nia rohan.
“Ba benefisiáriu sira ne’ebé simu ona iha tinan ida-ne’e, maibé benefisiáriu sira ne’ebé halo re-verifikasaun dukumentu balun ne’ebé falla no verifika direitu hahú husi Janeiru mak sei halo pagamentu iha inísiu ka Outubru nia rohan inklui ho benefisiáriu rejistu foun sira,” nia katak.
Benefisiáriu sira ne’ebé rejistu foun hetan pagamentu hahú iha Jullu ba leten.
Daudaun ne’e, ekipa MSSI halo re-verifikasaun no idetifika hotu ona to’o ohin sei update nafatin iha sistema tanbá munisípiu balun sei iha prosesu hela.
“Iha Setembru nia rohan ita bele informa katak husi dadus ba faze daruak ba re-verifikasaun sira-ne’e hira no ida rejistu foun hamutuk hira,” nia tenik.
MSSI aloka millaun $7 ba programa referida. Husi orsamentu hirak ne’e, implementa ona hodi fasilita benefisiáriu faze dahuluk hamutuk 4.279 ho orsamentu millaun $4 no nia balansu purvolta millaun $3.
Nune’e, MSSI koopera ho Banku Nasionál Komersiu Timor-Leste (BNCTL, sigla portugés) hodi halo pagamentu ba benefisiáriu sira.
“Pagamentu kuaze konklui ona. Nune’e ita kontinua fali re-verifikasaun no rejistu foun ba benefisiáriu sira,” Diretór Jerál hato’o.
Programa Bolsa da Mãe Kondisionál mak hamnesan programa apoiu finanseiru ba família vulnerável iha Timor-Leste, ho intensaun atu promove saúde no bein estár ba inan, laktante no labarik liuhusi kondisaun ne’ebé liga ho nutrisaun no saúde.
Programa ne’e lansa iha tinan 2024 ho totál benefisiáriu 59.813 iha faze dahuluk, ne’ebé implementa husi MSSI. Programa ne’e subtitui programa antigu ‘Bolsa da Mãe Jerasaun Foun’.
Nune’e, kada benefisiáriu hetan subsídiu mensál ne’ebé la hanesan, husi $8 no $10, bazeia ba siklu eskolár labarik benefisiáriu sira hodi insentiva frekuénsia eskolár. Aleinde ne’e, valór sira ne’ebé aloka ba labarik sira ne’ebé ho defisiénsia iha idade eskolár no frekuenta eskola aumenta $5, ne’ebé subliña kompromisu Governu nian hodi promove ekuidade.
Inisiativa husi programa ne’e mak atu envolve Programa Mundiál ba Aihan ba distribuisaun aihan nutritivu, ne’ebé finansia husi Orsamentu Jerál Estadu.
Jornalista : Osória Marques
Editora : Julia Chatarina
