DILI, 04 Setembru 2025 (TATOLI)—Ministériu Ensinu Superiór Siénsia no Kultura (MESSK) no Institutu Katólika Formasaun Profesór (ICFP) Baukau, Kinta ne’e, realiza semináriu nasionál ho tema ‘Hametin kolaborasaun liuhusi fahe prátika di’ak sira iha formasaun inisiál profesór iha Timor-Leste.’
“Institutu Katólika Formasaun Profesór Baukau oferese nia graduadu lubuk ida. Nune’e, Ministériu Edukasaun halo rekrutamentu no hetan kandidatu ne’ebé di’ak husi sira-nia institutu ne’e. Tanba ne’e sira hakarak sai profesór, la’ós tanba manán osan maibé tanba responsabilidade ba ita-nia jerasaun tuir mai. Profesór iha buat ne’ebé todan la’ós kma’an. Hanorin ita-nia estudante sira ba fururu sai líder ne’ebé kualidade,” Ministru Ensinu Superiór, Siénsia no Kultura, José Honório da Costa Pereira Jerónimo hato’o iha salaun City8, Manleuana.
Notísia relevante : ME kontinua esforsu fornese ekipamentu ba formasaun profesór nian
Biban ne’e, Ministru nafatin enkoraja ICFP Baukau atu kontinua hanorin no fasilita formasaun ho másimu no resposabilidade atu nune’e bele hetan profesór ne’ebé kualidade di’ak iha fururu.
Profesór mak lutadór
Iha sorin seluk, Vise Primeiru-Ministru, Ministru Asuntu Sosiál no Ministru Dezenvolvimentu Rurál no Abitasaun Komunitária, Mariano Assanami Sabino hateten, profesór mak lutadór ne’ebé konstrui atu prepara jerasaun foun lori bá fururu dezenvolvementu edukasionál.
Governante ne’e konsidera, edukasaun ne’e importante, tanba ne’e fó atensaun atu kontinua fasilita formasaun ba profesór.
“Ba alin sira tenke aprende atubele iha abilidade hodi rezolve problema oinoin iha konstrusaun Estadu ida-ne’e, liliu ba dezenvolvementu nasionál,” Vise Primeiru-Ministru fó hanoin.
Nia enkoraja profesór sira tenke matenek atu kontribui matenek ne’ebé ativu, tanba ne’e liuhusi semináriu bele fahe esperiénsia, hanoin, ideia no prátika oinsá bele iha nia kualidade.
“Entaun esperiénsia tenke transforma-an ba siénsia no responsabilidade ba ita-nia oan sira. Profesór sira-ne’e nia papél krusiál, vitál, no importante tebes ba konstrusaun Estadu ida-ne’e,” Assanami rekoñese.
Dezenvolve jerasaun foun
Nune’e mós, Diretór ICFP Baukau, Paulo Gilchrist esplika, prátika di’ak sira iha formasaun inisiál profesór iha Timor-Leste ne’e hanesan parte ida husi esforsu atu suporta implementasaun ba dezenvolvimentu nasionál, ne’ebé fó prioridade no dezenvolve ba jerasaun foun Timor-Leste atu sai edukadór matenek, moris di’ak, no produtivu hodi asesu ba edukasaun ho kualidade.
“Importante ba instituisaun sira iha fornesimentu edukasaun ho kualidade atubele iha responde ba nesesidade sosiál iha kontestu ida-ne’e. Universidade sira tenke prodús graduadu ne’ebé ho kualidade di’ak atubele kontribui ba merkadu. Entaun formasaun inisiál ho kualidade ida-ne’e importante tebes,” nia katak.
Tanba ne’e, semináriu ida-ne’e presiza iha kolaborasaun forte entre instituisaun akadémiku no komunidade atubele halo intervensaun. Nune’e, ICFP serbisu hamutuk ho MESSK, ho parseria estratéjiku sira atu fó kontribuisaun ba kualidade formasaun ba edukadór sira iha Timor-Leste.
“Prosedimentu no planu ne’ebé efetivu maka ekipa halo ona semináriu ida-ne’e hamutuk ho reprezentante sira husi MESSK. Tanba semináriu nasionál ida-ne’e nia objetivu prinsipál sira mak hanesan esperiénsia no prátika di’ak entre instituisaun sira, ne’ebé fó formasaun inisiál ba edukadór sira,” Diretór institutu tenik.
Nia dehan, MESSK,Ministériu Edukasaun (ME) no Institutu Nasionál Formasaun ba Dosente no Profissionál Educasaun (INFODEPE) tenke kontinua serbisu hamutuk ho instituisaun relevante sira hodi uniformiza formasaun inisiál ba edukadór sira iha Timor-Leste.
Nune’e mós, Adjuntu Embaixadór Austrália iha Timor-Leste, Edward Wilkinson hateten formasaun ba profesór ne’e atu haree plataforma ida no dezenvolve asuntu importante sira inklui setór Edukasaun.
“Instituisaun akadémiku sira hotu kontribui atu halo semináriu importante ida-ne’e hodi realiza ohin loron. Semináriu ida-ne’e fó oportunidade di’ak tebes atu aumenta espriénsia husi lisaun sira hodi fahe entre instituisaun ne’ebé mak parseiru dezenvolvimentu ho MEMinistériu Edukasaun,” nia hatutan.
Jornalista : Osória Marques
Editora : Julia Chatarina
