BOBONARU, 09 setembru 2025 (TATOLI) – Estudante husi Ensinu Sekundáriu Jerál (ESG, sigla portugés) Filiál Dom Martinho da Costa Balibo Five, husi Departamentu Siénsia no Teknolojia, resikla lixu sai produtu útil, hanesan ba vestuáriu hodi utiliza iha atividade fashion show, karnavál no seluk tan.
Estudante Jacob da Silva haktuir katak inisiativa ne’e halo tanba haree ba problema lixu ohin loron, nune’e ho kriatividade ne’ebé iha rekolla sasán ne’ebé la uza hanesan saku, suratahan, jornál hodi transforma sai produtu foun.
Nia dehan obra artístika ne’e dezeña ho modelu haat, rua ba feto no rua seluk ba mane. Ba vestuáriu feto, ida uza karón aat infeita ho ai-funan, borboleta, kurasaun no kór osan-mean. Nia signifikadu mak ai-funan atu atrai ema barak nia matan, borboleta hanesan insektu ida importante hodi kuidadu ekosistema, karón ho kór mutin ne’e naroman.
“Durante ne’e ita hanoin lixu hanesan fo’er ou nakukun. Ohin loron sai naroman, depois kurasaun ne’e reprezenta domin ita ema nia hodi kuidadu mundu. Kór osan-mean, ami uza hodi reprezenta valór no rikusoin husi buat ne’ebé laiha valór hodi sai valór”, nia hateten hafoin aprezentasaun iha Feira Karreira no Edukasaun, iha Jinazíu Maliana, ohin.
Nune’e mós estudante Maria Virgínia Rosária Sanches, esplika kona-ba vestuáriu feto utiliza jornal aat, tanba era ida ohin loron mundu teknolojia avansadu no mai ho versaun ne’ebé la hanesan, inklui asesu informasaun ho lais liu.
“Hanesan iha tempu uluk seidauk iha teknolojia, ema sempre asesu informasaun liuhusi jornál no seluk tan. La signifika ho teknolojia agora, ita bele so’e [jornál] naklekar iha fatin ne’ebé de’it, hanoin ho kreativu sai ai-funan”, nia hateten.
Nia subliña obra ne’e hanesan mensajen no fó hanoin ba estudante sira no komunidade iha territóriu, liuliu iha munisípiu Bobonaru atu hadomi ambiente, katak lixu la’ós fo’er, maibé bele transforma sai kriatividade.
Iha oportunidade ne’e, Sekretáriu Estadu Formasaun Profisionál no Empregu (SEFOPE), Rogério de Araújo Mendonça, kongratula kriatividade estudante no manorin sira ne’ebé konsege transforma ona lixu sai produ útil, hanesan parte ida mós bolu atensaun ema hotu nian atu kuidadu ambiente.
Governante ne’e promote ssei hato’o ba Sekretáriu Estadu Arte no Kultura (SEAK) atu apoia ESG Balibo hodi dezenvolve kriatividade no promove obra artístika ne’e ba iha eventu nasionál. “Ita bo’ot sira-nia obra ho esplikasaun sira ohin, hakarak muda povu no joven sira-nia mentalidade”, nia louva tanba ohin loron ema sunu rai no soe lixu arbiru.
Nia konsidera feira ne’e aumenta konxiénsia kona-ba sustentabilidade, indústria moda nian no buka beibeik dalan sira atu hamenus ninia impaktu negativu ba ambiente.
Notísia relevante: SEFOPE organiza Feira Karreira no Edukasaun iha Bobonaru
Jornalista: Sergio da Cruz
Editora: Maria Auxiliadora
