DILI, 10 Setembru 2025 (TATOLI)-Diplomata Zacarias Albano da Costa hasoru malu ho Primeiru-Ministru, Xanana Gusmão, hodi relata serbisu nu’udar Sekretáriu Ezekutivu Komunidade País Ko’alia Lian Portugés (CPLP), ne’ebé termina ona iha 31 Jullu 2025.
Nia dehan sorumutu ho Xefe Governu ne’e tanba antes ne’e primeiru-ministru mak husu bainhira mandatu hotu tenke mai relata. Nune’e, iha enkontru ne’e ko’alia no la’ós de’it kona-ba situasaun jerál CPLP, maibé aborda mós sobre problema sira neʼebé nasaun ne’e hasoru no nia parte mós bele fó kontribuisaun ba hadi’a rai ne’e ba oin.
“Primeiru-ministru rekoñese servisu neʼebé ha’u halo iha mandatu nu’udar Sekretáriu Ezekutivu CPLP nian durante tinan haat. Primeiru-ministru hein katak ha’u bele fó ha’u-nia kontribuisaun iha dezenvolvimentu rai ne’e ba oin”, Zacarias Albano hateten iha Palásiu Governu, ohin.
Tuir nia, serbisu sira ne’ebé halo durante mandatu mak hanesan ratifikasaun akordu mobilidade CPLP husi Estadu-membru sira hotu nu’udar momentu istóriku tebes, mezmu ho dezafiu sira.
“Balansu pozitivu satisfeitu tebes durante tinan haat no dezafiu barak iha implementasaun akordu mobilidade. Dezafiu iha inísiu ho objetivu jerál pilár ekonómiku, dezafiu reestruturasaun sekretariadu ho seluk tan to’o ikus la’ós CPLP, maibé komunidade internasionál enfrenta iha mundu transformasaun”, dehan.
Lembra katak Konsellu Ministru aprova, iha 2023, aprezentasaun rekandidatura Zacarias Albano da Costa ba kargu Sekretáriu Ezekutivu CPLP ba mandatu tinan rua tan husi 2023 to’o 2025.
Zacarias Albano da Costa asume knaar nu’udar Sekretáriu Ezekutivu CPLP iha períodu dahuluk iha tinan 2021-2023.
Notísia relevante: Fátima Jardim substitui Zacarias Albano nu’udár Sekretaria Ezekutiva CPLP
Jornalista: Arminda Fonseca
Editora: Maria Auxiliadora
